ریاض سہیل بی بی سی اردو ڈاٹ کام، کراچی

’بلدیاتی انتخابات شفاف اور غیرجانبدار ہو ہی نہیں سکتے‘

پیپلز پارٹی نے ان معاملات پر دوسری سیاسی جماعتوں کے ساتھ مل کر لائحہ عمل طے کرنے کے لیے تیرہ اگست کو آل پارٹیز کانفرنسں طلب کرنے کا اعلان کیا ہے۔

پی پی پی کے صوبائی جنرل سیکریٹری نفیس احمد صدیقی اور قائد حزب اختلاف نثار احمد کھوڑو نے پیر کے روز دو پریس کانفرنسوں میں حکومت اور الیکشن کمیشن کو سخت تنقید کا نشانہ بنایا ہے۔

نفیس احمد صدیقی کا کہنا تھا کہ دادو میں ہمارے دس کے قریب امیدواروں کو جھوٹے مقدمات درج کر کےگرفتار کیا گیا ۔ انہوں نے کہا کہ ڈسٹرکٹ رٹرننگ افسر نے ان کو بازیاب کروانے کا حکم دیا جس پر دو سول ججز نے ان افراد کو بازیاب کروایا مگر پولیس نے انہی لوگوں پر مقدمہ درج کر لیا ہے۔

نفیس صدیقی کے مطابق چیف الیکشن کمشنر جسٹس عبدالحمید ڈوگر نے دادو کے ڈی پی او اور ڈی سی او کے خلاف مقدمہ درج کرنے کا حکم دیا تھا مگر اس پر عملدرآمد نہیں ہو سکا۔

انہوں نے بتایا کہ ووٹر لسٹوں میں بھی ٹمپرنگ کی گئی ہے۔ کراچی میں اورنگی ٹاؤن میں ایک یونین کونسل میں آٹھ سو جعلی ووٹ درج ہیں جبکہ دادو ضلع کی تحصیل میھڑ کی ایک یونین کاؤنسل کی ووٹر لسٹ میں دو ہزار پانچ لکھا ہوا ہے جبکہ اس سال میں کوئی ووٹر لسٹ بنائی نہیں گئی ہے۔

اپوزیشن رہنما نثار کھوڑو کا کہنا تھا کہ اگر چیف الیکشن کمشنر اپنے احکامات پر عملدرآمد نہیں کروا سکتے تو وہ اپنا عہدہ چھوڑ دیں۔نثار کھوڑو نے کہا کہ موجودہ انتخابات صدر جنرل پرویز مشرف کے حکم پر ہو رہے ہیں اور ان کی موجودگی میں بلدیاتی انتخابات شفاف اور غیرجانبدار ہو ہی نہیں سکتے۔