اعجاز مہر بی بی سی اردو ڈاٹ کام، اسلام آباد

	عمران کے خلاف ریفرنس آئین کی شق باسٹھ اور تریسٹھ کےتحت بھیجا گیا

قومی اسمبلی کے ترجمان نے اس امر کی تصدیق کرتے ہوئے کہا کہ سپیکر چودھری امیر حسین نے بدھ کو عمران خان کی نااہلی کے متعلق ریفرنس چیف الیکشن کمشنر کو بھیجا ہے۔

سابق وزیراعظم میر ظفراللہ جمالی نے عمران خان کی نا اہلی کے لیے ایم کیو ایم کا ریفرنس چیف الیکشن کمشنر کو بھجوانے پر افسوس کا اظہار کیا ہے۔صحافیوں سے بات کرتے ہوئے انہوں نے کہا کہ اس وقت ملکی حالات ٹھیک نہیں ہیں اور سپیکر کو ایسا نہیں کرنا چاہیے تھا۔

عمران خان کے خلاف یہ ریفرنس امریکہ کے شہر لاس اینجلس کی ایک عدالت کی جانب سے دیے گئے اس فیصلے کی بنا پر دائر کیا گیا ہے جس میں تیس جولائی انیس سو ستانوے کو عدالت نے کہا تھا کہ عمران خان سیتا وائٹ کی بچی کے والد ہیں۔

ایم کیو ایم نے یہ ریفرنس آئین کی شق باسٹھ اور تریسٹھ اور عوامی نمائندگی کے 1976کے قانون کے تحت دائر کیا تھا۔ ایم کیو ایم کا کہنا تھا کہ آئین کی متعلقہ شقوں اور قانون کے تحت غیر ازدواجی جنسی تعلقات رکھنے والا کوئی بھی شخص رکن قومی اسمبلی نہیں بن سکتا۔

عمران خان اور ایم کیو ایم میں تنازعہ بارہ مئی سے اس وقت شروع ہوا تھا جب کراچی میں چیف جسٹس افتخار محمد چودھری کی آمد کے موقع پر پرتشدد واقعات ہوئے۔ عمران خان کا کہنا ہے کہ ان کی جماعت کے کارکنوں کو نشانہ بنایا گیا جبکہ ایم کیو ایم اس کی تردید کرتی ہے۔

عمران خان نے ایم کیو ایم کے خود ساختہ جلاوطن رہنما الطاف حسین پر بارہ مئی کے واقعات کا الزام لگا کر برطانوی حکومت سے انہیں ملک بدر کرنے اور ان کی شہریت منسوخ کرنے کا مطالبہ کیا تھا۔ عمران خان نے الطاف حسین کے خلاف اس بارے میں برطانوی عدالت میں مقدمہ دائر کرانے کا اعلان بھی کیا تھا اور دعویٰ کیا تھا کہ وہ برطانوی پولیس کو الطاف حسین کے مبینہ طور پر پرتشدد واقعات میں ملوث ہونے کے ثبوت بھی فراہم کریں گے۔

واضح رہے کہ قانون کے مطابق سپیکر ریفرنس موصول ہونے کے تیس روز کے اندر اسے چیف الیکشن کمشنر کو بھجوانے کا پابند ہے۔ چیف الیکشن کمشنر ریفرنس الیکشن کمیشن کے سامنے رکھے گا اور کمیشن چیف الیکشن کمشنر کو ریفرنس موصول ہونے کی تاریخ کے تین ماہ کے اندر فیصلہ دینے کا پابند ہوگا۔