عمران خان کا کہنا ہے کہ انہوں نے الطاف حسین کے خلاف ثبوت جمع کرلیے ہیں

دریں اثنا اسلام آباد سے نامہ نگار اعجاز مہر کے مطابق عمران خان نے لندن روانگی سےقبل صحافیوں سے بات کرتے ہوئے کہا کہ انہوں نے الطاف حسین کے خلاف ثبوت جمع کرلیے ہیں اور اب وہ برطانوی عدالت میں ان کے خلاف مقدمہ درج کریں گے۔

ہم پکا ہاتھ ڈالیں گے: عمران خان

لندن میں مقدمہ دائر کریں گے: عمران

انہوں نے کہا کہ ’پاکستان میں انہیں (الطاف حسین) کو سزا دلوانا مشکل ہے اس لیے برطانیہ میں مقدمہ کر رہا ہوں کیونکہ وہ دس برس سے وہاں قیام پذیر ہیں اور برطانوی شہری بھی ہیں‘۔

اس سے قبل بی بی سی کے نامہ نگار باربرا پلٹ نے اپنے مراسلے میں بتایا تھا کہ ان کی (الطاف حسین) پارٹی پر الزام ہے کہ اس نے گزشتہ ماہ چیف جسٹس کو کراچی کے دورے سے روکنے کے لیے تشدد سے کام لیا۔

ایم کیو ایم جنرل مشرف کی اتحادی ہے جن کی چیف جسٹس کو معطل کرنے کی کوشش حکومت مخالف تحریک کو ہوا دینے کا باعث بن چکی ہے۔

باربرا نے عمران کے حوالے سے کہا تھا کہ ’اپنی جماعت کے تمام فیصلے الطاف حسین خود کرتے ہیں اس لیے کراچی میں ہونے والے اس تشدد کے لیے جس کا الزام ان کے جماعت پر لگایا جاتا ہے الطاف حسین کو ہی ذمہ دار ٹھہرایا جانا چاہیے‘۔

ایم کیو ایم اگرچہ اس تشدد کی ذمہ دار ہونے کی تردید کرتی ہے لیکن وہ شدت پسندی اور سڑکوں پر فساد میں ملوث ہونے کی تاریخ رکھتی ہے۔

الطاف حسین 1990 کی دہائی میں اس وقت لندن آ گئے تھے جب ان کی جماعت کو ختم کرنے کے لیے فوجی کارروائی کی گئی تھی۔

انہوں نے یہاں سیاسی پناہ لی اور شہریت اختیار کر لی اور اب جلاوطنی سے اپنی جماعت کی قیادت کرتے ہیں۔

کراچی میں تشدد اس وقت رونما ہوا تھا جب چیف جسٹس کراچی میں خطاب کرنے کے لیے آنے والے تھے اور ان کے حکومت مخالف حامی ان کا استقبال کرنے اور جلوس نکالنے کے لیے سڑکوں پر آ گئے تھے۔ اس موقع پر تشدد کے واقعات میں چالیس سے زائد لوگ ہلاک ہو گئے تھے۔