عبادالحق بی بی سی اردو ڈاٹ کام ، لاہور

	احمد اویس نے ابھی حال ہی میں تحریک انصاف میں شمولیت اختیار کی تھی

احمد اویس چیف جسٹس پاکستان جسٹس افتخار محمد چودھری کے فیصل آباد میں خطاب کی تقریب میں شرکت کے بعد اتوار کو واپس آئے تو ان کے دفتر میں کام کرنے والے ساتھی وکیل نے اطلاع دی کہ دفتر کا تالا ٹوٹا ہوا ہے اور تمام دستاویزات بکھرئے پڑے ہیں۔

احمد اویس لاہور ہائی کورٹ بار ایسوسی ایشن کے سابق صدر ہیں اور آئی ایس آئی کے سابق سربراہ جنرل (ر) حمید گل کے قریبی رشتہ دار ہیں۔

ان کا یہ دیرینہ مطالبہ رہا ہے کہ صدر جنرل پرویز مشرف کے خلاف آئین کی پامالی کرنے پر آئین کی شق چھ کے تحت غدرداری کا مقدمہ درج کرکے کارروائی ہونی چاہئے۔

احمد اویس نے اپنے مقدمہ میں اس بات کا ذکر کیا ہے کہ وہ ان دنوں عمران خان کی طرف سے دائر کردہ درخواست کی پیروی کررہے ہیں بلکہ سپریم کورٹ کے تیرہ رکنی فل بنچ کے روبرو چیف جسٹس آف پاکستان کے حق میں اور صدر جنرل پرویز مشرف کے خلاف ڈسٹرکٹ بار ایسوسی ایشن لاہور کی درخواست میں بطور وکیل پیش ہور ہے ہیں۔

ان کا کہنا ہے کہ ان کے کمرے میں میز اور الماری کی درازوں کے تالے توڑ کر ان کو کھولا گیا تھا اور اہم کاغذات اور دستاویزات کو چرانے کی کوشش کی گئی ہے۔

احمد اویس نے اپنے مقدمہ میں اس بات کا ذکر کیا ہے کہ وہ ان دنوں عمران خان کی طرف سے دائر کردہ درخواست کی پیروی کررہے ہیں بلکہ سپریم کورٹ کے تیرہ رکنی فل بنچ کے روبرو چیف جسٹس آف پاکستان کے حق میں اور صدر جنرل پرویز مشرف کے خلاف ڈسٹرکٹ بار ایسوسی ایشن لاہور کی درخواست میں بطور وکیل پیش ہور ہے ہیں۔

ان کے بقول ان کےدفتر کے تالے توڑنے کے واقعہ میں خفیہ ایجنسیوں کا ہاتھ ہے اور یہ تمام کارروائی ان کو ہراساں کرنے کے لئے کی گئی ہے۔ اگر یہ چوری کی واردات ہوتی تو چور قمیتی چیزوں کو چوری ضرور کرتا۔

احمد اویس کا دفتر لاہور ہائیکورٹ سے کچھ فاصلے پر واقع اس عمارت میں ہے جہاں نیب کے سابق پراسیکیوٹر جنرل پاکستان نوید رسول مرزا اور سپریم جوڈیشل کونسل میں دائر صدارتی ریفرنس میں صدر کے وکیل اور سابق وائس چیئرمین عارف چودھری کے دفاتر بھی ہیں۔

واضح رہے کہ احمد اویس چند ماہ قبل تحریک انصاف میں شامل ہوئے تھے اور ان کے پاس جماعت کے مرکزی سیکرٹری اطلاعات کا عہدہ بھی ہے۔