رفاقت علی بی بی سی اردو ڈاٹ کام، اسلام آباد

	بلوچستان سے تعلق رکھنے والے واحد کمبر کے گھروالوں کا کہنا ہے کہ وہ ڈھائی ماہ سے لاپتہ ہیں

جسٹس جاوید اقبال نے دو سال سے لاپتہ نوجوان فیصل فراز کی ماں کو تسلی دیتے ہوئے کہا کہ عدالت ان کا بیٹا ہر صورت بازیاب کرائے گی۔

سپریم کورٹ نے حکم دیا کہ تین سال سے لاپتہ حافظ عبد الباسط کو اگلی پیشی پر عدالت میں پیش کیا جائے۔

فیصل آباد کے پولیس اہلکاروں نےعدالت کو بتایا کہ انہوں نےحافظ عبد الباسط کو جنوری دو ہزار چار میں اپنے اعلی افسران کے کہنے پر پنڈی بھٹیاں کے مقام پر ملٹری اٹیلینجس کے ایک کپتان عامر کے حوالے کیا تھا اور اس سے حوالگی کی باقاعدہ رسید بھی حاصل کی تھی۔ پولیس نے مذکورہ رسید عدالت میں پیش بھی کی۔

حافظ عبد الباسط کے ماموں نےعدالت کو بتایا کہ وہ پچھلے تین سالوں میں ایک دفعہ اپنے بھانجے سے مل چکے ہیں جبکہ ایک دفعہ ان کی ٹیلی فون پر بات کرائی گئی۔

عدالت میں موجود فوج کے نمائندے کرنل جاوید اقبال لودھی نے عبد الباسط کے بارے میں لاعملی کا اظہار کرتے ہوئے کہا کہ فوج میں عامر نامی کئی کیپٹن ہوں گے لہذا وہ اس طرح پتہ نہیں لگا سکتے۔

جسٹس جاوید اقبال نے کہا کہ متعلقہ اداروں کو ہرصورت بتانا ہوگا کہ حافظ عبدالباسط کہاں ہیں۔

حکومتی وکیل طارق کھوکھر نے عدالت کو بتایا کہ مزید چار لاپتہ افراد کا پتہ چلا لیا گیا ہے اور اس طرح سپریم کورٹ نے جب سے لاپتہ افراد سے متعلق مقدمہ شروع کیا ہے اس وقت سے اب تک 102 لاپتہ افراد کو ڈھونڈا جا چکا ہے۔

طارق کھوکھر نے عدالت کو بتایا کہ جن لاپتہ افراد کو بازیاب کر لیا گیا ہے ان میں شبیر احمد، محمد جان مسعود، افضل دلبر، اور شبیر ترارو شامل ہیں۔

ایک اور لاپتہ فرد مسعود جنجوعہ کی بیوی آمنہ مسعود نے عدالت میں ایک بیان حلفی جمع کرایا ہے جس میں انہوں نے کہا ہے کہ ان کو خفیہ اداروں کی تحویل سے رہا ہونے والے لوگوں نے بتایا ہے کہ ان کے شوہر آئی ایس آئی کے قبضے میں ہیں۔

انہوں نے کہا کہ خفیہ ادارے راولپنڈی میں واقع 501 ورکشاپ میں بھی لوگوں کو غیر قانونی حراست میں رکھتے ہیں۔