عزیزاللہ خان بی بی سی اردو ڈاٹ کام، کوئٹہ

	بی این پی نے قائدین کی گرفتاریوں کیخلاف مظاہروں کا اعلان کیا تھا

نوشکی کے پولیس افسر عیسیٰ جان نے بتایا کہ نوشکی میں چند دن قبل دفعہ ایک سو چوالیس نافذ کر دی گئی تھی اور بی این پی کے دو رہنماؤں جہانزیب جمالدینی اور خورشید کو گرفتار کیا گیا ہے۔

جہانزیب جمالدینی نے تھانے سے ٹیلیفون پر بتایا کہ انہیں سٹیج تو نہیں بنانے دیا گیا تاہم انہوں نے لوگوں سے خطاب کیا جس دوران انہیں حراست میں لے لیا گیا جس کے بعد احتجاجی مظاہرہ کیا گیا ہے۔ انہوں نے کہا کہ شہر کے داخلی اور خارجی راستے بند کر دیے گئے تھے۔

ادھر کوئٹہ میں بی این پی کے رہنما حبیب جالب نے بتایا کہ ان کے علاوہ جماعت کے دیگر رہنما ولی کاکڑ اور آغا حسن کو کوئٹہ قریب ہزار گنجی کے مقام پر پولیس نے حراست میں لے کر ریسٹ ہاؤس میں بٹھا دیا اور کوئی دس گھنٹے بعد رہا کیا گیا ہے۔

کوئٹہ کے پولیس افسر رحمت اللہ نیازی نے بتایا کہ بی این پی کے قائدین کو حراست میں نہیں لیا گیا بلکہ انہیں کوئٹہ سے باہر جانے نہیں دیا گیا۔

بلوچستان نیشنل پارٹی نے صوبے میں جاری فوجی کارروائی اور قائدین کی گرفتاریوں کے خلاف احتجاجی مظاہروں اور جلسوں کا اعلان کیا تھا۔ اس سلسلے میں خضدار میں بی این پی کو جلسہ منعقد نہیں کر نے دیا گیا تھا۔