عبادالحق بی بی سی اردو ڈاٹ کام، لاہور

	عدالتی احکامات کا علم نہیں تھا، چوبیس مئی کو پیش ہوجاؤں گی‘

تہمینہ دولتانہ کے خلاف سنہ دو ہزار دو میں کار سرکار میں مداخلت کرنے کے الزام میں لاہور کے علاقہ کوٹ لکھپت میں مقدمہ درج ہوا تھا۔ تہمینہ دولتانہ نواز شریف دور حکومت میں وفاقی وزیر رہ چکی ہیں اور بارہ اکتوبر ننانوے کے بعد سے مسلم لیگ(ن) کی سرگرم عمل رہنماؤں میں شمار ہوتی ہیں۔

عدالت کے متعدد مرتبہ طلب کرنے کے باوجود تہمینہ دولتانہ اپنے خلاف قائم ہونے والے مقدمہ کے حوالے سے عدالت میں پیش نہیں ہوئیں جس پر جمعرات کو سول جج کم جوڈیشل مجسٹریٹ یاسین موہل نے تہمینہ دولتانہ کے پانچ برس پرانے مقدمہ میں پیش نہ ہونے کا نوٹس لیا اور تہمینہ دولتانہ ناقابل ضمانت وارنٹ گرفتاری جاری کردئیے۔

عدالت نے کوٹ لکھپت پولیس کو ہدایت کی کہ وہ رکن قومی اسمبلی اور اپوزیشن جماعتوں کے اتحاد اے آر ڈی کی مرکزی نائب صدر کو گرفتار کر کے عدالت میں پیش کریں۔

تہمینہ دولتانہ نے بی بی سی کو بتایا کہ ان کو عدالت کے احکامات کے بارے میں علم نہیں تھا، اب وہ چوبیس مئی کو عدالت میں پیش ہوجائیں گی۔
ان کا کہنا تھا کہ جس مقدمہ میں ان کے ناقابل ضمانت وارنٹ گرفتاری جاری کیے گئے ہیں اس مقدمہ میں عدالت نے ان کی ضمانت منظور کر رکھی ہے۔

تمہینہ دولتانہ نے کہا کہ وہ اپنے خلاف مقدمات سے خوف زدہ ہونے والی نہیں ہیں، پہلے بھی جمہوریت کی بحالی کی تحریک کی پاداش میں نو مرتبہ جیل جاچکی ہیں اور اب بھی نہیں گھبراتیں۔ ’حکومت جب ضرورت محسوس کرتی ہے تو ایک نیا مقدمہ تیار کرلیا جاتا ہے‘۔