رفعت اللہ اورکزئی بی بی سی اردو ڈاٹ کام، پشاور

	زخمیوں کو لیڈی ریڈنگ ہسپتال پہنچایا گیا

ایک عینی شاہد عبد القیوم بخاری نے بی بی سی کو بتایا کہ پچیس افراد کی لاشیں انہوں نے خود اٹھائی ہیں جبکہ زخمیوں کی تعداد زیادہ تھی۔

پشاور میں خود کش دھماکہ

پشاور میں دھماکہ اور ہلاکتیں

انہوں نے کہا کہ ’دھماکے کی وجہ سے کچھ لاشیں ہوٹل سے باہر آ گریں جبکہ انسانی اعضاء اور خون بھی سڑک پر جگہ جگہ بکھرا ہوا تھا۔ حملے کی شدت کے باعث سڑک پر جانے والا ایک آٹو رکشہ موٹر سائیکل سے ٹکرایا جس سے موٹر سائیکل سوار بھی ہلاک ہوا‘۔

دھماکے میں زخمی ہونے والے مرحبا ہوٹل کے ایک ملازم اختر محمد نے بتایا کہ دھماکہ اتنا شدید تھا کہ جیسے ہوٹل کی تین منزلہ عمارت زمین بوس ہو گئی ہو۔

انہوں نے کہا کہ ’مجھے خود بھی یقین نہیں آرہا ہے کہ اللہ تعالی نے مجھے کیسا بچایا ہے کیونکہ اس واقعہ میں میرے کئی دوست جاں بحق ہوئے ہیں۔دھماکے کے بعد ہوٹل میں اچانک ایک اندھیرا سا چھاگیا اور پھر میں بے ہوش ہوگیا۔آنکھ کھلی تو میں ہسپتال میں پڑا ہوا تھا‘۔

زندہ بچنے پر بے یقینی  ’مجھے خود بھی یقین نہیں آرہا ہے کہ اللہ تعالی نے مجھے کیسا بچایا ہے کیونکہ اس واقعہ میں میرے کئی دوست جاں بحق ہوئے ہیں۔دھماکے کے بعد ہوٹل میں اچانک ایک اندھیرا سا چھاگیا اور پھر میں بے ہوش ہوگیا۔آنکھ کھلی تو میں ہسپتال میں پڑا ہوا تھا ملازم اختر محمد

انہوں نے بتایا کہ اس ہوٹل پر اکثر اوقات افغان مہاجرین زیادہ آتے تھے کیونکہ اس کا کابلی پلاؤ اور تکہ کباب افغانستان سے آنے والے لوگوں کی مشہور ڈش تھی۔

ایک اور عینی شاہد افتخار نے بتایا کہ ’جب دھماکہ ہوا تو میں اس وقت مسجد مہابت خان میں وضو کر رہا تھا، دوڑ کر باہر آیا تو ہر طرف چیخ وپکار اور لوگوں کی لاشیں پڑی ہوئی تھیں۔ ایسا لگ رہا تھا کہ جیسے قیامت ٹوٹ پڑی ہو‘۔

انہوں نے کہا کہ چونکہ یہ ہوٹل لیڈی ریڈنگ ہپستال کے قریب واقع ہے اس لیے یہاں پر اکثر اوقات کھانا کھانے والوں کا زیادہ رش رہتا تھا۔

ہپستال ذرائع نے حملے میں ہلاک ہونے والے چوبیس افراد کے ناموں کا اعلان کر دیا ہے۔ ان میں صدرالدین، قائم الدین، کریم الدین، کریم شاہ، عمران، شوکت، حسن، فضل سبحان، نصیراحمد، عظمت، شریف اللہ، نذیر، محمد، بشیر، شیراز پروینہ، خان محمد، حاجی خیام، جعفر، صلاح الدین، محمد اللہ اور سید اظہر اور ایک خاتون مرجانہ شامل ہیں۔