رفعت اللہ اورکزئی بی بی سی اردو ڈاٹ کام، پشاور

	کارخانو مارکیٹ پاکستان کے قبائلی علاقے خیبر ایجنسی کے ساتھ ملحقہ بندوبستی علاقے میں واقع ہے

پولیس کے مطابق جمعہ کےصبح کارخانو مارکیٹ میں کمبل اور قالینوں کے سب سے بڑے مرکز علی محمد آفریدی افغان مارکیٹ میں شارٹ سرکٹ کی وجہ سے اچانک آگ بھڑک اٹھی جس نے کچھ ہی وقت میں پوری مارکیٹ کو اپنی لپیٹ میں لے لیا۔

کنٹونمنٹ بورڈ، سٹی ڈسٹرکٹ اور پاک فضائیہ کی فائر بریگیڈ کی ٹیموں نے جائے وقوعہ پر پہنچ کر آگ بجھانے کی کوششیں کیں تاہم اس وقت تک آگ کافی پھیل چکی تھی اور دکانوں میں موجود سارا سامان جل چکا تھا۔

عینی شاہدوں کا کہنا ہے کہ آگ اتنی پھیل چکی تھی کے فائر بریگیڈ کی ٹیموں سے بجھانے میں شدید مشکلات کا سامنا کرنا پڑا اور بہت کوششوں کے بعد شام پانچ بجے آگ پر قابو پالیا گیا۔

مقامی لوگوں نے بتایا کہ ڈیڑھ سو سے زائد دکانوں میں موجود کروڑوں روپے مالیت کے قالین اورکمبل جل کر راکھ کے ڈھیر بن گئے۔

مارکیٹ کے مالک علی محمد آفریدی کے مطابق چار سو دوکانیں جل گئی ہیں جبکہ پولیس اور دیگر ذرائع یہ تعداد دو سو بتارہے ہیں۔

ادھر دوسری طرف اسی تجارتی مرکز میں پشاور اور خیبر ایجنسی کو ملانے والے پٹی پر قائم غیر قانونی اشیاء کے کاروبار کے لیے مشہور مارکیٹ میں پولیس اور خاصہ داروں کے مشترکہ آپریشن کے دوران چالیس سے زائد دکانوں کے تالے توڑ کر وہاں سے شراب، چرس، افیون، فحش سی ڈیز اور دیگر غیر قانونی اشیاء ضبط کرلی گئیں ہیں۔

پولیس کے مطابق یہ جگہ جرائم پیشہ افراد ، کار چور ، اغوا کار اور منشیات فروشوں کا گڑھ بن چکا تھا جہاں پر ہر قسم کا غیر قانونی کاروبار ہوتا تھا۔

آپریشن میں دو سو پولیس اور خاصہ دار اہلکاروں نے حصہ لیا۔