رفعت اللہ اورکزئی بی بی سی اردو ڈاٹ کام، پشاور

	فائرنگ سے تین امریکی فوجی زخمی بھی ہوئے

پاکستان فوج کے ترجمان میجر جنرل وحید ارشد نے بی بی سی کو بتایا کہ یہ حملہ پیر کو پاکستان، افغانستان اور اتحادی افواج کے اہلکاروں کے درمیان فلیگ میٹنگ ختم ہونے کے بعد پیش آیا۔

جبکہ افغان حکومت نے اس واقعے کو’پاکستانی جارحیت‘ قرار دیتے ہوئے اقوامِ متحدہ سے احتجاج بھی کیا ہے۔

پاکستان فوج کے ترجمان کے مطابق واقعہ گزشتہ روز کے فائرنگ کے واقعہ کے بعد بلائے جانے والے اجلاس کے خاتمے پر اس وقت پیش آیا جب اجلاس ختم ہونے کے بعد جانے والے اہلکاروں پر نامعلوم افراد کی جانب سے فائرنگ کی گئی جس سے امریکہ اور پاکستان کا ایک ایک سکیورٹی اہلکار ہلاک اور دونوں ملکوں کے تین تین فوجی زخمی ہوئے۔

ترجمان نے بتایا کہ یہ حملہ پاکستان کے علاقے میں پیش آیا۔ انہوں نے بتایا کہ حملے کے فوری بعد پاکستانی سکیورٹی فورسز نے حملہ آوروں کی تلاش کے لیے آپریشن شروع کردیا ہے۔

جنرل وحید ارشد نے افغان حکومت کی ان الزامات کی سختی سے تردید کی جس میں کہا گیا ہے کہ حملے میں پاکستانی فورسز نے دو امریکی فوجیوں کو فائرنگ کر کے ہلاک کیا ہے۔

اس سے قبل افغان وزرات دفاع کے ترجمان جنرل ظاہر عظیمی نے خبر رساں ادارے رائٹرز سے بات کرتے ہوئے الزام لگایا تھا کہ’ فلیگ میٹنگ کے دوران ایک پاکستانی فوجی نے کھڑے ہو کر امریکی فوجیوں پر فائرنگ جس سے دو امریکی اہلکار ہلاک اور دو زخمی ہوئے اور امریکیوں کی جوابی فائرنگ سے متعدد پاکستانی فوجی مارے گئے‘۔

واضح رہے کہ گزشتہ روز پاک افغان سرحد پر پاکستان اور افغانستان کے فورسز کے مابین ایک سرحدی جھڑپ میں سات افراد ہلاک ہوگئے تھے جس کے بعد دونوں ممالک کے مابین بھاری ہتھیاروں سے فائرنگ کا سلسلہ شروع ہوا تھا۔