بیورو رپورٹ بی بی سی اردو ڈاٹ کام، اسلام آباد

	طالبان بھاری اسلح سے لیس ہیں

طالبان اور مقامی لوگوں کے درمیان شادی کی تقریب میں گانے بجانے کے مسئلے پر شروع ہونے والی اس لڑائی میں کل رات تک دو افراد زخمی ہو گئے تھے۔ مقامی طالبان نے ڈوڈا گاؤں کے افراد کی جانب سے مزاحمت پر چھ دیہاتیوں کو یرغمال بھی بنا لیا تھا۔ ان افراد کو تو آج علی الصبح رہا کر دیا گیا ہے لیکن علاقہ میں کشیدگی بدستور برقرار ہے۔

طالبان کا تعلق شاہ حسن خیل گاؤں سے ہے جو ڈوڈا سے دو کلومیٹر پر واقع ہے۔ ان دونوں دیہات کے درمیان واقع عبدالخیل نامی گاؤں میں فرنٹئیر کانسٹیبلری پر مشتمل نیم فوجں دستوں نے پڑاؤ ڈال رکھا ہے۔ عینی شاہدین کے مطابق یہ نیم فوجی دستے ہلکے اور بھاری ہتھیاروں اور بکتر بند گاڑیوں سے لیس ہیں۔

مقامی صحافی غلام اکبر کے مطابق پاک فوج کے دستے لکی مروت شہر پہنچ گئے ہیں اور وہاں کے ایک ہائی سکول میں عارضی کیمپ قائم کر لیا ہے۔

ادھر طالبان نے مقامی انتظامیہ کو خبر دار کیا ہے کہ اگر ان کے خلاف طاقت استعمال کی گئی تو وہ جنوبی وزیستان کے طالبان کمانڈر بیت اللہ محسود سے مدد طلب کرنے پر مجبور ہوں گے۔