طالبان نے صوبہ فرح کے بکوا شہر پر قبضہ کر لیا تھا۔

طالبان جنگجؤوں نےاتوار کے روز بکوہ پرقبضہ کر لیا تھا۔

افغانستان کے وزارت داخلہ کے ترجمان زمرئی بشری نے خبر رساں ادارے اے ایف پی اور اے پی کو بتایا ہے کہ افغان فوجیوں جن کو نیٹو افواج کی مدد حاصل تھی بکوہ کو طالبان کے قبضے سے باآسانی چھڑا لیا ہے۔

طالبان کے ترجمان قاری محمد یوسف نے بی بی سی اردو ڈاٹ کام کے عبدالحئی کاکڑ کو بتایا تھا کہ اتوار کی شب طالبان جنگجوؤں نے بکوہ شہر پر حملہ کر کے شہر کا مکمل کنٹرول حاصل کر لیا جبکہ افغان پولیس نے کوئی مزاحمت نہیں کی۔

افغان وزارت داخلہ کے ترجمان کے مطابق افغان فوج نے منگل کی صبح شہر کا دوبارہ کنٹرول حاصل کر لیا ہے۔ ترجمان کے مطابق طالبان جنگجوؤں نے افغان کو آتے دیکھ خود ہر شہر چھوڑ دیا۔

صوبہ فرح کا شہر بکوہ قندہار سے تقریباً پچپن کلومیٹر دور واقع ہے۔

واضح رہے کہ جنوبی افغانستان کے صوبہ ہلمند کے موسی قلعہ اور ضلع واشیر کے بعد بکوہ تیسرا شہر ہے جس پر طالبان نے قبضہ کیا ہے۔

طالبان کا دعوی ہے کہ انکا جنوبی افغانستان کے کئی صوبوں پر کنٹرول حاصل ہے تاہم افغان حکام اس بات کی تردید کر تے رہے ہیں۔