عبدالحئی کاکڑ بی بی سی اردوڈاٹ کام، اسلام آباد

	ازبک پوزیشنوں پر توپ خانے سے گولہ باری بھی کی گئی

84 ازبکوں سمیت 110 افراد ہلاک

پیر کو ہفتہ وار پریس بریفنگ سے خطاب کرتے ہوئے پاکستان کے وزارت خارجہ کی ترجمان تسنیم اسلم کا کہنا تھا اب امریکہ اور دیگر ممالک پر یہ بات واضح ہونی چاہیے کہ مقامی قبائل کے ساتھ حکومت کے امن معاہدے کے مثبت نتائج سامنے آرہے ہیں۔

جنوبی وزیرستان سے ملنے والی اطلاعات کے مطابق صوبہ ہلمند میں طالبان کے سابق گورنر نور محمد ثاقب اتوار کی رات کو وانا پہنچے ہیں جہاں انہوں نے مقامی جنگجوؤں اور ازبک عسکریت پسندوں کے درمیان مصالحت کرانے کی کوششیں شروع کر دی ہیں۔

درایں اثنا جمیعت علماء اسلام سمیع الحق گروپ کے رہنماء مولانا نصیب اللہ اور شیر علی خان بھی نور محمد ثاقب کی معاونت کے لیے اس وقت جنوبی وزیرستان کے صدر مقام وانا میں موجود ہیں۔ یہ دونوں رہنما مقامی طالبان کے امیر مولوی نذیر کے استاد رہ چکے ہیں۔

جنوبی وزیرستان میں مقامی طالبان اور ازبک عسکریت پسندوں کے درمیان پانچ دنوں تک جاری رہنے والی لڑائی میں حکومت کے مطابق ایک سو ساٹھ افراد ہلاک ہو چکے ہیں جن میں ایک سو تیس ازبک شامل تھے جب کہ مقامی لوگ مرنے والوں کی تعداد تقریباً پینتیس بتا رہے ہیں۔

لڑائی کے دوران مقامی طالبان نے باسٹھ ازبک جنگجوؤں کے گرد محاصرہ قائم کیا تھا جو اب تک بر قرار ہے اور تازہ ترین اطلاعات کے مطابق محصور ازبک عسکریت پسندوں نے اس بات کا عندیہ دیا ہے کہ اگر محاصرہ ختم کیا جاتا ہے تو وہ علاقے میں امن و امان واپس لوٹانے میں ہاتھ بٹاسکتے ہیں۔

اطلاعات کے مطابق جنوبی وزیرستان میں اس وقت لڑائی رک گئی ہے اور فریقین کے درمیان جنگ بندی پر عملدرآمد جاری ہے۔