ریاض سہیل بی بی سی اردو ڈاٹ کام کراچی

	سات سالہ شبیراں تاحال لاپتہ ہے اس کے والدین سردار واحد بخش پر الزام عائد کرتے رہے ہیں جب کہ وہ اس سے لاعلمی کا اظہار کرتے ہیں

قبائلی سردار واحد بخش بھیو پر الزام تھا کہ انہوں نے ایک سات سالہ بچی شبیراں کو قرض کے عوض گھر میں یرغمال رکھا ہوا تھا۔

سکھر کی انسداد دہشت گردی کی عدالت نمبر ون کے جج نے پاکستان پیپلز پارٹی کے رہنما سردار واحد بحش بھیو کی ضمانت رد کردی۔

شبیراں کی والدہ مسمات حمیداں نے سندھ ہائی کورٹ سے درخواست کی تھی جس میں کہا گیا تھا کہ ان کی سات سالہ بیٹی شبیراں اپنے ماموں نظر محمد کے پاس رہتی تھی، انہوں نے شببیراں کو سردار واحد بخش بھیو کے گھر میں کام کاج کے لیے ملازم رکھوایا تھا اور ستر ہزار قرض لیا تھا۔

مسمات حمیداں کا کہنا ہے کہ سردار واحد بخش نےلڑکی واپس دینے سے انکار کردیا تھا۔

اس درخواست پر سندھ ہائی کورٹ نے شکارپور پولیس کو سردار واحد بخش کے خلاف لڑکی کو یرغمال بنانے کے الزام میں مقدمہ دائر کرنے کا حکم جاری کیا تھا۔

ماموں نے ستر ہزار قرض لیا تھا  سات سالہ بیٹی شبیراں اپنے ماموں نظر محمد کے پاس رہتی تھی، انہوں نے شببیراں کو سردار واحد بخش بھیو کے گھر میں کام کاج کے لیے ملازم رکھوایا تھا اور ستر ہزار قرض لیا تھا

شبیراں کی والدہ نے سپریم کورٹ کے غیر فعال چیف جسٹس افتخار محمد چودھری کو ایک خط لکھ کر انصاف کی اپیل کی تھی۔ چیف جسٹس نے اس درخواست کا نوٹس لیتے ہوئے سردار واحد بخش اور شکارپور پولیس کو اسلام آباد طلب کیا تھا۔

جسٹس افتخار محمد چودھری نے سردار واحد بخش بھیو کی عبوری ضمانت منسوخ کرنے کی ہدایت کی تھی۔

سنیچر کو سماعت کے موقع پر خصوصی عدالت نے سردار واحد بخش کی ضمانت منسوخ کر کے انہیں جیل بہیج دیا۔

واضح رہے کہ سات سالہ شبیراں تاحال لاپتہ ہے اس کے والدین سردار واحد بخش پر الزام عائد کرتے رہے ہیں جب کہ وہ اس سے لاعلمی کا اظہار کرتے ہیں۔