اعجاز مہر بی بی سی اردو ڈاٹ کام، اسلام آباد

	پاکستانی وفد کی قیادت وزارتِ خارجہ کے ایڈیشنل سیکریٹری طارق عثمان حیدر جبکہ بھارتی وفد کی قیادت کے سی سنگھ کر رہے ہیں

حکام کے مطابق دونوں ممالک نے انسدادِ دہشت گردی کے بارے میں تجاویز کا تبادلہ کیا ہے۔

دفترِ خارجہ کی ترجمان تسنیم اسلم نے بتایا کہ بدھ کو بھارتی وفد پاکستان کے سکریٹری خارجہ سے ملاقات کرے گا جس کے بعد بیان جاری کیا جائے گا۔

پہلے دن کی بات چیت کے بارے میں فریقین آن دی ریکارڈ کچھ بھی بتانے سے گریز کر رہے ہیں۔ تاہم نام ظاہر نہ کرنے کی شرط پر سفارتی ذرائع کا کہنا ہے کہ ہندوستان کے نمائندوں نے کشمیر میں شدت پسندی رکوانے میں پاکستان سے تعاون پر بات کی جبکہ پاکستان نے افغانستان میں بھارت کی بڑھتی ہوئی سرگرمیوں اور بلوچ قوم پرستوں کی مدد کے متعلق معاملات اٹھائے ہیں۔

پاکستانی وفد کی قیادت وزارتِ خارجہ کے ایڈیشنل سکریٹری طارق عثمان حیدر جبکہ بھارتی وفد کی قیادت کے سی سنگھ کر رہے ہیں۔

دونوں ممالک میں نصف صدی سے بھی زائد عرصہ تک پائی جانے والی
بد اعتمادی کے بعد یہ پہلا موقع ہے کہ دونوں نے دہشت گردی روکنے
جیسے حساس اور اہم موضوع پر تعاون کے بارے میں بات کی ہے۔

دونوں ممالک میں دہشت گردی کی تشریح پر بھی واضح اختلاف رائے رہا ہے۔ بھارت کے زیر انتظام کشمیر میں شدت پسند کارروائیوں کا پاکستان حامی رہا اور اُسے جہاد کہتا رہا ہے جبکہ ہندوستان ایسی کارروائیوں کو دہشت گردی قرار دیتے ہوئے اس کی ذمہ داری بھی پاکستان پر عائد کرتا رہا ہے۔

حکام کے مطابق بھارت نے سمجہوتہ ایکسپریس کی تحقیقات کے متعلق زیادہ معلومات پاکستان کو یہ کہتے ہوئے فراہم نہیں کی کہ ابھی جانچ جاری ہے۔ لیکن ان کے مطابق تحقیقات کے سلسلے میں جن پاکستانیوں پر شبہ ہے اس بارے میں پاکستان سے مدد مانگی ہے اور کچھ معلومات بھی دی ہے۔ واضح رہے کہ سمجھوتہ ایکسپریس میں دھماکوں کے بعد آگ لگنے سے اڑسٹھ افراد ہلاک ہوئے تھے جس میں زیادہ تر پاکستانی تھے۔

	گزشتہ سال صدر مشرف اور وزیراعظم منموہن سنگھ کے درمیان یہ طے پایا تھا کہ دونوں ممالک دہشگردی پر قابو پانے کے لیے ایک دوسرے سے خفیہ معلومات کا تبادلہ کریں گے

واضح رہے کہ گزشتہ سال غیر جانبدار ممالک کی سربراہ کانفرنس کے موقع پر صدر جنرل مشرف اور وزیراعظم منموہن سنگھ کے درمیان یہ طے پایا تھا کہ دونوں ممالک دہشگردی پر قابو پانے کے لیے ایک دوسرے سے خفیہ معلومات کا تبادلہ کریں گے۔

دونوں ممالک کشمیر سمیت تمام دیگر تصفیہ طلب مسائل پر بھی گزشتوں تین برسوں سے بات چیت کرتے رہے ہیں لیکن ابھی تک مذاکرات جاری رہنے کے علاوہ کوئی بڑی پیش رفت نہیں ہو سکی۔

پاکستان کی وزارتِ خارجہ کی ترجمان نے گزشتہ روز ایک بریفنگ میں کہا تھا کہ پاکستان کو توقع ہے کہ بھارت سمجھوتہ ایکسپریس کے سانحے کے متعلق معلومات پاکستان کو مہیا کرے گا۔