عدنان عادل بی بی سی اردو ڈاٹ کام، لاہور

	کھر کہتے ہیں کہ اس وقت قوم کی سوچ اور موڈ جنرل کی وردی کے حق میں نہیں

بدھ کو لاہور پریس کلب میں ایک اخباری کانفرنس سے خطاب کرتے ہوئے پنجاب سابق گورنر اور سابق وزیر اعلی مصطفی کھر نے کہا کہ موجودہ حکمران ایک بھی ضمنی انتخاب صاف شفاف اور منصفانہ طور پر نہیں کراسکے جبکہ کسی حکومت کے لیے یہ ایک آسان الیکشن ہوتا ہے تو وہ عام انتخابات کیوں کرائیں گے جس میں ان کی چھٹی ہوجائے۔

مصطفی کھر نے کہا کہ انہیں لگتا ہے کہ ملک میں یا تو ایمرجنسی لگا کر الیکشن ملتوی کیے جائیں گے یا مارشل لاء لگے گا اور دونوں صورتوں میں سب سے پہلے جنرل مشرف کی چھٹی ہوگی۔

انہوں نے کہا کہ جنرل مشرف کے لیے ایک ہی با عزت راستہ ہے اور وہ یہ کہ وہ فیصلہ کریں کہ وہ حکمرانی نہیں کرسکتے اور سیاستدانوں سے واپسی کا محفوظ راستہ لینے کے لیے بات چیت کریں اور ان کا مشورہ ہے کہ سیاستدانوں کو مشرف کو واپسی کا راستہ دینا چاہیے۔

انہوں نے کہا کہ نواز شریف اور بے نظیر بھٹو ملک کے دو سب سے بڑے سیاسی لیڈر ہیں اور انہیں کوئی ایسا فیصلہ نہیں کرنا چاہیے جو عوام قبول نہ کریں۔

کھر نے کہا کہ وہ سوچ رہے ہیں کہ ملک کے تمام دانشوروں کی ایک کانفرنس بلائیں جو مل بیٹھ کر سیاستدانوں کے لیے رہنما اصول بنا سکیں۔

کھر نے کہا کہ ان کا مشورہ ہے کہ نواز شریف اور بے نظیر بھٹو دونوں کو آل پارٹیز کانفرنس میں شریک ہونا چاہیے اور اسے انا کا مسئلہ نہیں بنانا چاہیے۔

انہوں نے کہا کہ دونوں رہنماؤں کے پاس یہ سنہری موقع ہے کہ وہ مل بیٹھیں اور عوام میں نئی امید پیدا کریں۔

انہوں نے کہا کہ اگر نواز شریف اور بے نظیر نے یہ موقع ضائع کردیا تو قوم میں سخت مایوسی پیدا ہوگی۔

مصطفی کھر نے کہا کہ ان دونوں رہنماؤں کے پاس آخری موقع ہے کہ وہ ذاتی مفادات پس پشت ڈال کر قوم کے مفاد میں فیصلہ کریں اور وہ قوم کے غیر متنازعہ رہنما بن جائیں بصورت دیگر اس ملک میں پرانے سیاستدان ختم ہوجائیں گے اور نئی سیاسی قیادت آئے گی۔

کھر نے کہا کہ پیپلز پارٹی سے بات چیت میں کہا جارہا ہے کہ حکمرانوں کو پیپلز پارٹی تو قبول ہے لیکن بے نظیر قبول نہیں تو اس بات کاماننا پیپلز پارٹی کے تابوت میں آخری کیل ٹھوکنے کے مترادف ہوگا۔

کھر نے کہا کہ وہ سوچ رہے ہیں کہ ملک کے تمام دانشوروں کی ایک کانفرنس بلائیں جو مل بیٹھ کر سیاستدانوں کے لیے رہنما اصول بنا سکیں۔