عبدالحئی کاکڑ بی بی سی اردو ڈاٹ کام ،پشاور

	کئی لوگوں نے دینی علماء کے کہنے پر بچوں کو قطرے نہیں پلائے

صوبہ سرحد کے وزیر صحت عنایت اللہ نے اس بات کی تصدیق کر تے ہوئے کہا کہ حکومت کو پولیو کے وائرس کے خاتمے کی مہم میں جن مشکلات کا سامنا ہے ان میں دوردراز علاقوں تک عدم رسائی ،امن و امان کی ابتر صورتحال کے علاوہ ان مقامی دینی علماء کی مخالفت بھی شامل ہے جو بچوں کو پولیو کے قطرے پلانے کو غیر شرعی اور مسلمانوں کے مخالفین کا سازش قرار دے رہے ہیں۔

عنایت اللہ کا کہنا ہے کہ صوبہ سرحد کے لکی مروت، سوات، بنوں، دیر بالا اور ڈیرہ اسماعیل خان کے علاوہ باجوڑ اور جنوبی اور شمالی وزیرستان میں زیادہ لوگوں نے بچوں کو پولیو قطرے پلانے سے انکار کر دیا ہے۔

ان کا کہنا تھا کہ ’بعض علاقوں تک رسائی مشکل ہے جبکہ کچھ ضلعوں میں مقامی مذہبی عالمان یہ غلط فہمی پھیلا رہے ہیں کہ پو لیو کے قطرے پلانے سے بچے بانچھ پن کے شکار ہو جائیں گے۔‘

صوبہ سرحد کے ضلع سوات میں مولانا فضل اللہ ان دینی علماء میں شامل ہیں جو اپنے غیر قانونی ایف ایم سٹیشن پر پولیو ویکسین کے خلاف تقاریر کرتے رہے ہیں۔ انہوں نے بی بی سی کو بتایا کہ ’ بچوں کو پو لیو ویکسین دینا مسلمانو ں کے مخالفین کی سازش ہے کیونکہ اس میں بانجھ پن کے اجزاء شامل ہیں۔‘

تاہم مولانا فضل اللہ اس سلسلے میں کوئی طبی ثبوت پیش نہ کر سکے۔

سوات میں علی گرام گاؤں کے محمد رحمان کا کہنا ہے کہ انہوں نے دینی علماء کے کہنے پر اپنے بچوں کو پولیو کے قطرے پلانے سےانکار کیا تھا۔

حکومت کو بعض مقامی مذہبی علماء کی مخالفت کا سامنا کئی بر سوں سے ہے۔گذشتہ سال ستمبر میں حکومت نے پشاور میں نامور علماء کی یک کانفرنس منعقد کی تھی جنہوں نے فتویٰ جاری کیا تھا کہ پولیوکے قطرے پلانا غیرشرعی عمل نہیں ہے۔

عالمی ادارہ صحت کے پشاور میں تعینات اہلکار ڈاکٹر سرفراز نے بی بی سی کو بتایا کہ صوبہ سرحد میں ہر دس میں سے دو بچے ایسے ہیں جو مقامی علماء کے کہنے پر پولیو ویکسین سے محروم ہوچکے ہیں۔