ایشوریہ رائے بھارتی پولیو مہم کی سفیر ہیں

ایشوریہ رائے اور پاکستانی گلوکار جواد احمد میں بھارت اور پاکستان میں پولیو کے خاتمے کے لیے چلائی جانے والی مہم کے اگلے مرحلے میں سفیر کے طور پر کام کریں گے۔

اس بات کا فیصلہ پاکستان اور بھارت کے وزرائے صحت نے ڈبلیو ایچ او کے ایک اجلاس میں کیا۔ پاکستانی وزیرِ صحت محمد نصیر خان نے بھارتی اخبار کو بتایا کہ ’ ہمیں اس بیماری کے خلاف مشترکہ جدوجہد کی ضرورت ہے اور دونوں ممالک دسمبر 2006 تک اس بیماری کے خاتمے کا منصوبہ رکھتے ہیں‘۔

اس مہم میں پاکستان اور بھارت میں اس بیماری کے خاتمے کی آگاہی کے سلسلے میں تقریبات بھی منعقد کی جائیں گی۔ گو کہ پاکستان میں بھارتی فلموں کی نمائش پر پابندی ہے لیکن بھارتی فنکاروں کی آمد پر کوئی روک ٹوک نہیں ہے۔

ایشوریہ رائے اور امیتابھ بچن بھارت میں پولیو کے خاتمے کے لیے چلائی جانے والی مہم کے سلسلے میں ٹی وی اور اخبارات میں شائع ہونے والے اشتہارات میں بھی آتے رہے ہیں۔

پاکستان اور بھارت وہ ممالک ہیں جہاں پولیو کے سب سے زیادہ کیس سامنے آتے ہیں۔