ریاض سہیل، عزیز اللہ خان بی بی سی اردو ڈاٹ کام، گوادر / کوئٹہ

	معاہدے کے تحت سنگاپور کی کمپنی چالیس سال تک گوادر پورٹ کاانتظام سنبھالے گی

اس معاہدے کے تحت سنگاپور کی کمپنی چالیس سال تک گوادر پورٹ کاانتظام سنبھالے گی۔ معاہدے کے تحت وفاقی اور صوبائی حکومتوں کی جانب سے ٹیکسوں کی مد میں بیس سال کے لئے چھوٹ دی گئی ہے۔ جبکہ کارپوریٹیو ٹیکس میں چالیس سال کی چھوٹ دی گئی ہے۔

معاہدے کی تقریب سے وزیراعظم شوکت عزیز نے بھی خطاب کیا۔ انہوں نے کہا کہ سنگاپور پورٹ اتھارٹی گوادر بندرگاہ کو جدید طریقے سے چلائے گی۔ جو دنیا میں بہتری نظرآرہی ہے وہ گوادر پورٹ پر بھی دکھائی دے گی۔

وزیراعظم نے کہا کہ ’گوادر بندرگاہ منفرد محل وقوع پر ہے۔ یہاں سے وسطی ایشیا، خلیجی ممالک اور افغانستان سامان لانے لے جانے میں آسانی پیدا ہوگی۔‘ انہوں نے کہا کہ سنگاپور پورٹ اتھارٹی کا پہلا کام بڑے بحری جہازوں کو یہاں لانا اور سرمایہ کاری کرنا ہے۔

وزیراعظم شوکت عزیز نے کہا کہ اس سے پہلے کراچی میں بڑے بحری جہازوں کو لانے کی سہولت موجود نہیں تھی اور بڑے جہاز کولمبو۔ سلالہ اور دبئی جاتے تھے جس سے وقت زیادہ لگتا اور خرچہ زیادہ آتا تھا لیکن گوادر بندرگاہ کے بعد دونوں میں کمی ہوگی۔

صوبے سے مشورہ نہیں وزیراعلی بلوچستان جام یوسف نے کہا کہ گوادر بندرگاہ سے ترقی کی نئی راہیں کھلیں گی جس سے صوبائی حکومت کو چار تا پانچ بلین روپے سالانہ رائلٹی کی مد میں ملیں گے۔ انہوں نے کہا کہ گوادر پورٹ کے لئے صوبائی اسمبلی کو اعتماد میں لینے کی ضرورت نہیں ہے۔گوادر پورٹ ایک نجی کمپنی کو عارضی طور پر چلانے کے لئے دیا جارہا ہے ہمیشہ کے لئے نہیں۔

اس موقع پر وزیراعلی بلوچستان جام یوسف نے کہا کہ گوادر بندرگاہ سے ترقی کی نئی راہیں کھلیں گی جس سے صوبائی حکومت کو چار تا پانچ بلین روپے سالانہ رائلٹی کی مد میں ملیں گے۔ انہوں نے کہا کہ گوادر پورٹ کے لئے صوبائی اسمبلی کو اعتماد میں لینے کی ضرورت نہیں ہے۔گوادر پورٹ ایک نجی کمپنی کو عارضی طور پر چلانے کے لئے دیا جارہا ہے ہمیشہ کے لئے نہیں۔

بلوچستان میں قوم پرست جماعتیں گوادر میگا پراجیکٹ کی مخالفت کر رہی ہیں۔ نیشنل پارٹی کے لیڈر حاصل بزنجو نے بی بی سی کو بتایا ہے کہ گوادر کے منصوبے کے حوالے سے انہیں خدشات لاحق ہیں اور اس کا اظہار انہوں نے ہر وقت کیا ہے۔

سنگاپور پورٹ اتھارٹی کو اس کا انتظام دینے کے حوالے سے حاصل بزنجو نے کہا ہے کہ جب تک ان کے مطالبات تسلیم نہیں کیے جاتے وہ اس کی ضمانت نہیں دے سکتے کہ مستقبل میں اگر حکومت تبدیل ہوتی ہے تو موجودہ فیصلوں پر اسی طرح عملدرآمد ہوگا۔

یاد رہے سابق کور کمانڈر اور سابق گورنر بلوچستان لیفٹیننٹ جنرل ریٹائرڈ عبدالقادر بلوچ نے ایک انٹرویو میں کہا تھا کہ ان کے دور میں وفاقی حکومت گوادر کو اسلام آباد کے زیرانتظام ایک سیکٹر کے طور پر لینا چاہتی تھی لیکن انہوں نے اس کی مخالفت کی تھی۔

قوم پرست جماعتوں کے مطابق وفاقی حکومت براہ راست بلوچستان کے معاملات میں مداخلت کر رہی ہے۔ حاصل بزنجو نے کہا ہے کہ گوادر کے حوالے سے بلوچستان اسمبلی اور سینیٹ میں بحث کرکے متفقہ فیصلہ کیا جانا چاہیے۔

گوادر میں گہرے پانی کی بندرگاہ چین کی مدد سے قائم کی جارہی ہے اور اس کے پہلے مرحلے کے لیے اگست دو ہزار ایک میں جو معاہدہ طے ہوا تھا اس کے تحت اس منصوبے پر دو سو اڑتالیس ملین امریکی ڈالر خرچ ہوگا جس کے لیے چین ایک سو اٹھانوے ملین ڈالر اور حکومت پاکستان پچاس ملین ڈالر دے گا۔

وزیر اعظم نے پہلے کہا تھا کہ گوادر بندرگاہ کے پہلے مرحلے کا افتتاح جنوری میں ہوگا لیکن اب اسے مارچ تک ملتوی کر دیا گیا ہے جس کی کوئی واضح وجوہات نہیں بتائی گئی ہیں۔