عدنان عادل بی بی سی اردوڈاٹ کام، لاہور

	معروف وکیل عارف بھنڈر کی عمر پینتالیس سال تھی

معروف وکیل عارف بھنڈر کی عمر پینتالیس سال تھی۔ لاہور سٹی پولیس چیف خواجہ خالد فاروق کا کہنا ہے کہ قتل کا محرک بظاہر ذاتی دشمنی ہے۔

پولیس کے مطابق یہ واقعہ صبح تقریباً سات بجے گنگا رام ہسپتال کے قریب وارث روڈ پر پیش آیا جب عارف بھنڈر اپنی گاڑی میں اپنے بھانجے محمد وسیم اور بھائی کاشف بھنڈر کے ساتھ جا رہے تھے کہ راستے میں نامعلوم افراد نے ان پر اندھا دھند فائرنگ کردی۔

	یہ واقعہ صبح تقریباً سات بجے گنگا رام ہسپتال کے قریب وارث روڈ پر پیش آیا

فائرنگ سے عارف بھنڈر اور ان کی حفاظت پر متعین تین پولیس اہلکار محمد قمر، محمد اسلم اور محمد خان اور ان کا ایک ذاتی محافظ محمد اکبر موقع پر ہلاک ہوگئے۔

ہلاک ہونے والوں میں عرف بھنڈر کا بھانجا بارہ سالہ وسیم اور پچیس سالہ بھائی کاشف بھی شامل ہیں۔ کاشف فیروز والا میں تحصیل میونسپل آفیسر تھے۔

فائرنگ سے بارہ سالہ وسیم اور پچیس سالہ کاشف بھی ہلاک ہوگئے۔ کاشف فیروز والا میں تحصیل میونسپل آفیسر تھے۔

دیگر افراد مختلف ہسپتالوں میں پہنچ کر دم توڑ گئے۔ پولیس کو جائے واردات سے کلاشنکوف فائرنگ کی گولیوں کے درجنوں خول ملے ہیں۔

عارف بھنڈر کی گاڑی کے آگے اور پیچھے ان کی حفاظت پر متعین پولیس گارڈز اور ذاتی محافظ تھے جنہوں نے حملہ آوروں پر جوابی فائرنگ کی ۔پولیس کے مطابق جوابی فائرنگ سے عارف بھنڈر کے حریف اور مبینہ حملہ آور ملک زاہد بھی ہلاک ہوگئے جبکہ دوسرے حملہ آور فرار ہونے میں کامیاب ہوگئے۔

فائرنگ میں پانچ افراد طارق، وارث، ندیم جوزف، مصطفے اور فیاض علی زخمی ہوئے ہیں۔

پولیس کا کہنا ہے کہ عارف بھنڈر کی کھوکھر ٹاؤن کے ملک زاہد نامی ایک شخص سے دیرینہ دشمنی چلی آرہی تھی۔ ان پر گزشتہ سال جنوری میں بھی قاتلانہ حملہ کیا گیا تھا لیکن وہ بال بال بچ گئے تھے۔

اس واقعہ کے بعد لاہور کی ضلعی عدالتوں میں وکلا نے کام کا بائیکاٹ کردیا اور پنجاب سیکریٹریٹ تک جلوس نکالا۔

لاہور ہائی کورٹ بار ایسوسی ایشن نے قتل کی واردات پر مذمتی قرار داد منظور کی ہے۔ لاہور میں وکلا نے پندرہ جنوری بروز پیر کو اس واقعہ کے خلاف احتجاج کرنے کا اعلان کیا ہے۔