ریاض سہیل بی بی سی اردو ڈاٹ کام، کراچی

	بے نظیر بھٹو چاہیں تو واپس آ سکتی ہیں مگر انہیں مقدمات کا سامنا کرنا ہوگا: شیخ رشید

کراچی میں اتوار کو ایک پریس کانفرنس سےخطاب کرتے ہوئے انہوں نے کہا کہ اپوزیشن کے لیے کئی اہم معاملات کا فیصلہ اگلے چند ماہ میں ہونا ہے۔

’سپریم کورٹ میں دوہری قومیت اور مدرسوں کی ڈگری سمیت اہم مقدمات زیر سماعت ہیں اور سیاسی حوالے سے آئندہ دو تین ماہ بڑی اہمیت کے حامل ہیں جس میں سارے فیصلے ہوجائیں گے۔‘

صدارتی انتخابات کے بارے میں وفاقی وزیر کا کہنا تھا کہ صدر پرویز مشرف اس اسمبلی سے بھی ووٹ لے سکتے ہیں اور آئندہ اسمبلی سے بھی مگر ان کی ذاتی سوچ یہ ہے کہ وہ اسی اسمبلی سے ووٹ لیں گے۔

انہوں نے کہا: ’نواز شریف لوگوں کا دل رکھنے کے لئے کہہ رہے ہیں کہ وہ آرہے۔ ان کو پتہ ہے کہ وہ نہیں آئیں گے تو ان کی پارٹی کا یہاں کوئی الیکشن نہیں ہو گا۔‘

ایک سوال کے جواب میں انہوں نے کہا کہ نواز شریف کو اگر پاکستان آنا ہے تو انہیں سعودی عرب واپس جانا پڑیگا۔ ان کے مطابق بینظیر بھٹو کے واپس آنے پر کوئی پابندی نہیں ہے، وہ واپس آسکتی ہیں مگر انہیں مقدمات کا سامنا کرنا پڑیگا۔

شیخ رشید احمد کا کہنا تھا کہ پی پی پی سے رابطے ختم نہیں ہوئے ہیں بہت ساری باتیں چل رہی ہیں۔ یہ رابطے کوئی حقیقی شکل اختیار کرتے ہیں یا نہیں یہ کہنا قبل از وقت ہے۔

انہوں نے جماعت اسلامی اور مسلم لیگ ن کا نام لئے بغیر کہا کہ پی پی پی، مولانا فضل الرحمان، جماعت اہل حدیث اور ایم کیو ایم، پیٹریاٹ آئندہ انتخابات میں حصہ لیں گےاور یہ ایک تاریخی الیکشن ہوگا۔

ریلوے میں اصلاحات کے بارے میں انہوں نے بتایا کہ کراچی کینٹ سٹیشن کی پچاس ہزار کی گنجائش کو بڑھا کر ایک لاکھ کیا جارہا ہے۔

حیدرآباد سے میرپورخاص، کوٹڑی سے ملیر تک ریلوے لائین کو تبدیل کیا جارہا ہے، جس سے سفر کم ہوجائیگا۔

انہوں نے بتایا کہ کراچی میں ریلوے ٹریک پر حادثات کی روک تھام کے لئے کینٹ سے لانڈھی تک ریلوے لائن کے دونوں اطراف میں حفاظتی دیواریں تعمیر کی جائیں گی۔