رفعت اللہ اورکزئی بی بی سی اردو ڈاٹ کام، پشاور

	باڑہ میں کشیدگی میں کوئی کمی نہیں آئی ہے

یہ واقعہ بدھ کی صبح دس بجے تحصیل باڑہ کے علاقے میں اس وقت پیش آیا جب مقامی صحافی محمد فاروق گھر سے پریس کلب کی طرف جارہے تھے۔ بی سی ٹو خاصہ دار چیک پوسٹ کے قریب نامعلوم مسلح نقاب پوشوں نے گاڑی سے نکل کر ان کو اغوا کرنے کی کوشش کی تاہم صحافی کی طرف سے مزاحمت پر انہیں کلاشن کوف کے بٹ مارے گئے جس سے ان کے سر اور کاندھے پر چوٹیں آئی۔

واقعے کے فوری بعد اے پی اے باڑہ اور پولیٹکل تحصیلدار موقع پر پہنچے اور زخمی صحافی کو ہسپتال پہنچایا جہاں پر ابتدائی طبی امداد کے بعد انہیں فارغ کردیا گیا۔

زخمی صحافی محمد فاروق نے بعد میں بی بی سی اردو ڈاٹ کام سے گفتگو کرتے ہوئے کہا کہ ملزمان انہیں اغوا کرنا چاہتے تھے تاہم مزاحمت پر انہیں زخمی کردیا گیا۔ انہوں نے واقعے کے بارے میں بتایا کہ ملزمان کی تعداد پانچ تھی اور سب کلاشن کوفوں سے مسلح اور چہروں پر نقاب پہنے ہوئے 72 ماڈل کی سبز رنگ کی کار میں سوار تھے۔

ان کا کہنا تھا کہ مزاحمت پر نہ صرف انہیں مارا پیٹا گیا بلکہ ان کی جیب سے دس ہزار روپے نقد اور ایک موبائل فون بھی چھین کرلے گئے۔

دریں اثناء قبائلی علاقوں میں صحافیوں کی تنظیم ٹرائیبل یونین آف جرنلسٹس خیبر ایجنسی کا ایک ہنگامی اجلاس منعقد ہوا جس میں مقامی اخباری نمائندے پر حملے کی شدید الفاظ میں مذمت کی گئی اور حکومت سے مطالبہ کیا گیا کہ حملے میں ملوث ملزمان کو فوری طور پر گرفتار کیا جائے۔

واضع رہے کہ چند ہفتے قبل باڑہ ہی سے تعلق رکھنے والے ایک اور صحافی قاضی رؤف کو ایک مذہبی تنظیم کے کارکنوں نے تشدد کا نشانہ بنایا تھا جبکہ کئی صحافیوں کو جان سے مارنے کی دھمکیاں دی گئی تھیں۔

یاد رہے کہ قبائلی علاقوں میں اخبار نویسوں کے خلاف تشدد کی کارروائیاں جاری ہیں جبکہ حکومت تاحال صحافیوں کو تحفظ فراہم کرنے میں ناکام دکھائی دے رہی ہے۔