ہارون رشید بی بی سی اردو ڈاٹ کام، پشاور

	باڑہ کا علاقہ فرنٹیر کور اور خاصہ دار فورسز کے قبضے میں ہے

منگل باغ سپاہ نامی ایک مقامی گروپ کے سینکڑوں مسلح افراد نے سنیچر کو علاقے میں امن و امان کی بگڑتی صورتحال کو وجہ بتاتے ہوئے باڑہ بازار کا کنٹرول سنبھال لیا تھا۔

گروپ کے سربراہ منگل باغ نے اس موقعہ پر علاقے میں اغوا، ڈکیتی اور دیگر جرائم کے لیئے اسلامی سزاؤں کا اعلان بھی کیا تھا۔

تاہم پشاور میں اتوار کوگورنر ہاوس سے جاری ایک سرکاری بیان میں دعوی کیا گیا ہے کہ حکام کی جانب سے بروقت سکیورٹی فورسز کو حرکت میں لانے سے لشکر کے لوگ رات کی تاریکی میں چلےگئے۔

سرکاری بیان کے مطابق اب باڑہ میں مکمل امن ہے اور کوئی کرفیو وغیرہ نہیں ہے۔ حکومت کا کہنا ہے کہ یہ سیاسی ایکشن منگل گروپ کی جانب سے غیرمشروط طور پر اپنی غیرقانونی سرگرمیاں ترک کرنے اور انتظامیہ کو تسلیم کرنے تک جاری رہے گا۔

ادھر باڑہ سے تعلق رکھنے والے لشکر کے حامی قبائلی جن میں تاجر، ڈاکٹر اور ٹرانسپورٹر شامل ہیں۔ پشاور میں ایک اخباری کانفرنس میں حکومتی اقدام کی مذمت کی اور کہا کہ لشکر کو آنے کی دعوت انہوں نے دی تھی۔

تاجر سعید ایاز نے بی بی سی کو بتایا کہ وہ گزشتہ پانچ ماہ کے دوران تمام سرکاری اہلکاروں کے دروازے کھٹکھٹائے تاکہ باڑہ میں امن قائم ہوسکے لیکن حکومت کوئی موثر اقدام کرنے میں ناکام رہی۔ ’اس صورتحال میں ہم نے تمام اقوام پر مشتمل اس لشکر کو آنے کی دعوت دی‘۔

	شہر میں جگہ جگہ فوج تعینات تھی

بیان میں مزید کہا گیا ہے کہ اس گروپ کے مسلح لوگوں نے پورے باڑہ بازار کو یرغمال بنایا اور یک طرفہ طور پر امن کمیٹی کے قیام کا اعلان کیا تاہم حکومت نے کارروائی کی تو منگل گروپ کے لوگ بقول حکومت رات کی تاریکی میں بھاگ گئے۔

توقع ہے کہ حکومت اتوار کی شام منگل باغ کے رشتہ دار کی باڑہ میں ایک مارکیٹ بھی مسمار کرنے کا ارادہ رکھتی ہے۔ اس کے لیئے قبائلیوں کو نوٹس جاری کیئے گئے ہیں۔

یاد رہے کہ اس برس مارچ میں دو دینی رہنماؤں مفتی منیر شاکر اور پیر سیف الرحمان کے حامیوں کے درمیان تصادم میں تیس سے زائد افراد ہلاک جبکہ درجنوں زخمی ہوئے تھے۔