عزیزاللہ خان بی بی سی اردو ڈاٹ کام، کوئٹہ

	ڈپٹی انسپکٹر جنرل پولیس پرویز ظہور نے بتایا ہے کہ اس واقعے کے بارے میں تحقیقات کی جارہی ہیں ( فائل فوٹو)

نوشکی سے پولیس اہلکاروں نے بتایا ہے کہ محمد یونس نویں جماعت کا طالبعلم تھا اورگھر کے باہر کھڑے دوست سے ملنے آیا تو اچانک دھماکہ ہوا جس سے محمد یونس کا سر اور ہاتھ دھڑ سے الگ ہو گئے تھے۔ انھوں نے کہا کہ ابھی تک یہ معلوم نہیں ہو سکا کہ یہ دھماکہ محمد یونس کے گھر کے باہر بجلی کے کھمبے کے پاس نصب دھماکہ خیز مواد سے ہوا یا وہ خود اسے اٹھائے ہوئے تھا۔

خضدار کے ڈپٹی انسپکٹر جنرل پولیس پرویز ظہور نے بتایا ہے کہ اس بارے میں تحقیقات کی جارہی ہیں اور زحمیوں سے پوچھ گچھ کے بعد اصل حقائق کا علم ہو سکے گا۔

اس کے علاوہ صوبے میں بلوچستان نیشنل پارٹی کی اپیل پر کہیں مکمل شٹر ڈاؤن ہڑتال تو کہیں جزوی ہڑتال کی گئی ہے۔ کوئٹہ میں کچھ دوکانیں اور کاروباری مراکز کھلے رہے تو کہیں بند رہے ہیں۔

خضدار میں مکمل ہڑتال کی گئی ہے جبکہ قلات میں ہڑتال نہیں ہو سکی۔ قلات سے مقامی صحافی محمود آفریدی نے بتایا ہے کہ بلوچستان نیشنل پارٹی کے تین اہم قائدین کو آج پولیس نے گرفتار کر لیا ہے۔ ادھر پنجگور سے آمدہ اطلاعات کے مطابق ایک احتجاجی ریلی نکالی گئی ہے جس کی قیادت بلوچستان اسمبلی کے قائد حزب اختلاف کچکول علی ایڈووکیٹ نے کی ہے۔