عزیزاللہ خان بی بی سی اردو ڈاٹ کام، کوئٹہ

	مولوی نور محمد کے مطابق قبائلی علاقوں میں فوجی آپریشن اور مدارس کے خلاف کارروائی ان کے استعفے کی وجوہات ہیں

کوئٹہ کے حلقہ دو سو انسٹھ سے منتخب ہونے والے جمعیت علماء اسلام سے تعلق رکھنے والے رکن قومی اسمبلی مولوی نور محمد نے الزام عائد کیا ہے کہ انہوں نے شریعت کے نفاذ اور خارجہ پالیسیوں میں تبدیلیوں کے جو وعدے لوگوں سے کیے تھے وہ پورے کرنے میں ناکام رہے ہیں۔

مولوی نور محمد نے کہا ہے کہ انہوں نے اپنا استعفی مجلس عمل کے صدر قاضی حسین احمد اور جنرل سیکرٹری مولانا فضل الرحمان کو بھجوا دیا ہے تاکہ وہ سپیکر قومی اسمبلی کے پاس بھیج دیں۔

ان سے جب پوچھا گیا کہ انھوں نے براہ راست اپنا استعفی سپیکر بلوچستان اسمبلی کو کیوں نہیں بھجوایا تو انہوں نے کہا کہ وہ مجلس عمل کے رکن ہیں اور مجلس عمل کی ٹکٹ پر ہی منتخب ہوئے تھے لہذا جماعت کے قائدین کو آگاہ کرنا ضروری ہے ۔

مولوی نور محمد نے یہ بھی کہا کہ قومی اسمبلی اور تمام صوبائی اسمبلیوں کے دیگر اراکین ان کا ساتھ دیں گے اور مجموعی طور پر اپنے استعفے پیش کریں گے۔

مولوی نور محمد نے دیگر وجوہات میں بتایا ہے کہ بلوچستان اور صوبہ سرحد اور قبائلی علاقوں میں جاری فوجی آپریشن ، دین دار لوگوں اور مدارس کے خلاف کارروائی ان کے استعفے کی وجوہات ہیں جن سے وہ اپنی جماعت کے علاوہ وزیر اعظم اور صدر کو آگاہ کرتے رہے ہیں۔

بلوچستان میں مجلس عمل حکمران جماعت مسلم لیگ کے ساتھ مخلوط حکومت میں شامل ہے اور حکومت کے قیام کے وقت مجلس عمل کے قائدین نے کہا تھا کہ وہ صوبے میں شریعت نافذ کریں گے اور شراب پر پابندی عائد کی جائے گی۔

اس سلسلے میں صوبائی وزیر مولانا عبدالباری کی سربراہی میں ایک کمیٹی بھی قائم کی گئی لیکن چار سال گزرنے کے باوجور یہ کمیٹی اسمبلی میں بل پیش نہیں کر پائی۔

مولوی نور محمدکے صوبے کے علاوہ مرکز میں بھی اپنی جماعت کے قائدین سے اختلافات رہے ہیں۔ گزشتہ دنوں مجلس عمل کے صوبائی سربراہ مولانا محمد خان شیرانی کے اس بیان پر کہ ان کی جماعت کے لوگ طالبان کا ساتھ نہ دیں، انہوں نے سخت رویہ اختیار کیا تھا۔

صوبے میں بلوچ قوم پرست جماعتیں بھی مجلس عمل پر یہ الزام عائد کر رہی ہیں کہ بلوچستان میں جاری فوجی آپریشن کی منظوری میں مجلس عمل کا ہاتھ بھی ہے لیکن مجلس عمل کے قائدین اس کی تردید کرتے ہیں۔