ندیم سعید بی بی سی اردو ڈاٹ کام، لندن

	سیاسی حریفوں کے درمیان آجکل تعلقات کا مثالی دور چل رہا ہے۔

بیگم عابدہ حسین اور سید فخر امام کے پی پی پی میں شمولیت کی افواہیں پچھلے کچھ عرصہ سے گردش میں تھیں۔ ان افواہوں کو تقویت اس وقت ملی جب اس سیاسی جوڑے کی بیٹی صغراء امام نے وزیر اعلیٰ پنجاب چوہدری پرویز الہی کی کابینہ سے استعفیٰ دے دیا۔

عابدہ حسین اور فخر امام اگرچہ نواز شریف کی مسلم لیگ میں شامل رہے لیکن ان کے پارٹی قیادت سے اختلافات کی خبریں بھی عام تھی۔ جنرل مشرف کے اقتدار میں آنے کے بعد دونوں میاں بیوی نے پنجاب کے سابق گورنر میاں اظہر کے ساتھ مل کر فوجی قیادت کا اعتماد حاصل کرنے کی کوشش کی لیکن ناکام رہے۔

نواز شریف ان وجوہات کی وجہ سے عابدہ حسین اور فخر امام کو پسند نہیں کرتے اور ان دونوں کے قریبی ذرائع کے مطابق اب تک وہی (نواز شریف) ان کی پی پی میں شمولیت کی راہ میں رکاوٹ رہے ہیں۔

یاد رہے کہ ایک دوسرے کی سیاسی حریف پیپلز پارٹی اور مسلم لیگ (نواز) کی قیادت کے درمیان ان دنوں تعلقات کا مثالی دور چل رہا ہے۔

سال دو ہزار دو میں ہونے والے عام انتخابات میں عابدہ حسین اور فخر امام باالترتیب اپنے اپنے انتخابی حلقوں میں پیپلز پارٹی کے امیدواروں فیصل صالح حیات اور رضا حیات ہراج سے شکست کھا گئے تھے۔

تاہم پیپلز پارٹی کے ان دونوں کامیاب امیدواروں نے بعد میں مشرف نواز پی پی پی (پیٹریاٹ) میں شمولیت اختیار کر کے وفاق میں وزارتیں حاصل کر لیں۔