حسن مجتبی سان ڈیاگو، کیلیفورنیا

	گرفتار ہونے والے چار نوجوانوں کا تعلق یا تو پاکستان کی انٹیلیجنس ایجنسیوں یا طالبان سے ہے: نیویارک ٹائمز

نیویارک ٹائمز نے منگل کی اشاعت میں اپنے پہلے صفحے پر شائع ہونے والی ایک بڑی سرخی میں لکھا ہے : ’افغانستان میں خود کش بمباروں سے پاکستان کا تعلق دیکھا جارہا ہے‘۔

اخبار نے کہا ہے کہ ماہ ستمبر کے آخر میں کراچي سے تعلق رکھنے والے ایک داؤد شاہ نامی نوجوان کو کابل میں گرفتار کیا گيا تھا جس نے جیل میں، نیویارک ٹائمز نمائندے کے بقول، اپنے نایاب انٹرویو میں کہا ہے کہ وہ پشاور سے بذریعہ ٹیکسی کابل کا سفر کرکے خود کش بمبار بننے آیا تھا۔

اکیس سالہ داؤد شاہ اصل میں افغان مہاجر ہے جواپنے خاندان سے کراچی کی مانسہرہ کالونی میں رہتا تھا جہاں اس کے والدین اور چھوٹے بھائی پر مشتمل خاندان اب بھی رہائش پذیر ہے۔

داؤد شاہ نے افغان جیل میں اپنے انٹرویو میں کہا ہے کہ اسے تین ساتھیوں سمیت مانسہرہ کالونی کراچي سے مسجد نور کے پیش امام مولانا عبدالشکور خیرپوری نے افغانستان ’جہاد‘ کے لیے بھیجا تھا۔ مولانا عبدالشکور خیرپوری نے، جن کے بارے میں بتایا گیا ہے کہ ان کا مبینہ تعلق کالعدم تنظیم حرکت المجاہدین سے ہے اور جو امریکی محکمہ خارجہ کی طرف سے جاری کی جانے والی دہشتگردی کی واچ لسٹ میں بھی شامل ہے، داؤد شاہ اور مسجد نور میں ا سکے تین ہم مکتب ساتھیوں کو پشاور کے قریب افغان مہاجر کیمپ میں ایک شخص پیر فاروق نامی کی طرف یہ کہہ کر بھیجا تھا کہ وہ ان نوجوانوں کو افغانستان جہاد کے لیے بھیجے گا۔

ٹیکسی ڈرائیور افغان ایجنٹ کابل میں پیر فاروق کے مبینہ پیغام پر ان کی ملاقات عمر نامی شخص سے ہوئی جنہوں نے انہیں کمر سے باندھنے والی پیٹیاں فراہم کی جن پر ریموٹ تاروں سے جڑے ریموٹ کنٹرول بم نصب تھے۔ داؤد شاہ نے جو ٹیکسی کرائے پر لی تھی اس کا ڈرائیور افغان انٹیلجنس ایجنٹ تھا جو داؤد شاہ کو اس کے بتائے ہوئے پتے کے بجائے افغان انٹیلجنس ایجنسی کے دفتر لے آیا۔ نیویارک ٹائمز

اخبار نے ایسے افغان اور نیٹو انٹیلیجنس ذرائع کے حوالے سے مزید بتایا ہے کہ جب پاکستانی انٹیلجنس کو پشاور کے نزدیک پیر فاروق اور افغانستان میں ان خودکش بمباروں کی گرفتاریوں کا بتایا گیا تو چند ہی دنوں بعد ان کے ایک مخبر کو پراسرار حالات میں قتل کردیا گيا۔

اخبار نے داؤد شاہ کے مبینہ انکشافات کے حوالے سے بتایا ہے کہ کابل میں پیر فاروق کے مبینہ پیغام پر ان کی ملاقات عمر نامی شخص سے ہوئی جنہوں نے انہیں کمر سے باندھنے والی پیٹیاں فراہم کی جن پر ریموٹ تاروں سے جڑے ریموٹ کنٹرول بم نصب تھے۔ داؤد شاہ نے جو ٹیکسی کرائے پر لی تھی اس کا ڈرائیور افغان انٹیلجنس ایجنٹ تھا جو داؤد شاہ کو اس کے بتائے ہوئے پتے کے بجائے افغان انٹیلجنس ایجنسی کے دفتر لے آیا۔

نیویارک ٹائمز کے نمائندے نے کراچی کی مانسہرہ کالونی میں افغانستان میں گرفتار کیئے جانے والے نوجوان داؤد شاہ کے والد احمد شاہ سے بھی ملاقات کی ہے۔ جس نے انہیں بتایا کہ داؤد شاہ چھٹی جماعت پاس تھا اور مسجد نور میں قرآنی تعلیم حاصل کرتا تھا- پھر داؤد شاہ کے والد نے کہا ’وہ بچوں کا باپ ہے لیکن اسے گھر کی کوئی فکر نہیں۔ وہ مرے یا جیے ہمیں بھی اس کی فکر نہیں‘۔

دوسری جانب مولوی عبدالشکور خيرپوری نے، نیویارک ٹائمز کی رپورٹ کے مطابق، اس کی تردید کی کہ انہوں نے داؤد شاہ کو افغانستان جہاد پر بھیجا ہے۔ مولانا شکور نے کہا ’وہ اتنا بزدل تھا کہ وہ جہاد پر کس طرح جا سکتا ہے‘۔ جبکہ عبدالشکور خیرپوری نے اس کی تردید کی کہ ان کا تعلق حرکت المجاہدین سے ہے۔ البتہ انہوں نے کہا کہ ان کا تعلق جمعیت علمائے اسلام یا جے یو آ‎ئی سے ہے۔

نیویارک ٹائمز نے افغان اور نیٹو انٹیلجنس کے حوالے سے کہا ہے کہ وہ ایسی کارروائیوں کا تعلق پاکستان سے دیکھ رہے ہیں۔