ریاض سہیل بی بی سی اردو ڈاٹ کام کراچی

	حملے کے ایک ماہ بعد رینجرز نے چاروں ملزمان کوگرفتار کرنے کا اعلان کیا تھا

سندھ ہائی کورٹ کے جسٹس رحمت حسین جعفری اور جسٹس یاسمین عباسی پر مشتمل بینچ نے منگل کو ملزم محمد حنیف، محمد عمران، محمد شارب اور حافظ زبیر کی اپیل منظور کرلی۔ ملزمان کا تعلق حرکت المجاہدین العالمی سے ہے۔

ان لوگوں پر الزام تھا کہ انہوں نے چودہ جون دو ہزار دو کو ایک خودکش حملے میں بارود سے بھری ایک گاڑی امریکی قونصل خانہ سے ٹکرادی تھی۔

حملے کے ایک ماہ بعد رینجرز نے چاروں ملزمان محمد حنیف، محمد عمران ، مامد شارب اور حافظ زبیر کو گرفتار کرنے کا اعلان کیا تھا۔ ملزمان پر انسداد دہشتگردی کی ایک عدالت میں مقدمہ چلایا گیا اور انہیں موت اور عمر قید کی سزا سنائی گئی۔

اس سزا کے خلاف ملزمان محمد حنیف، محمد عمران ، مامد شارب اور حافظ زبیر نے سندھ ہائی کورٹ کی اپیلیٹ بینچ میں اپیل کی تھی۔

حملے میں جوگاڑی استعمال کی گئی تھی اس کے بارے میں بتایا گیا تھا کہ وہ حملے سے ڈیڑھ ماہ قبل صدر جنرل پرویز مشرف کی کراچی آمد کے موقع پر ان پر حملے کرنے کے لیئے تیار کی گئی تھی مگر عین وقت اس کے الیکٹرک سوئچ نے کام نہیں کیا۔

دو ملزمان حنیف اور عمران بعض اور مقدمات میں بھی ملوث ہیں جن میں سے کچھ میں انہیں سزا ہوچکی ہے۔ اس لیئے ان کی رہائی کا کوئی امکان نہیں ہے۔