ریاض سہیل بی بی سی اردو ڈاٹ کام، کراچی

	حادثہ بس کا ٹائی راڈ ٹوٹنے کے باعث پیش آیا

روہڑی کے نزدیک قومی شاہراہ پر یہ حادثہ جمعرات کی شام اس وقت پیش آیا جب اروڑ سے آنے والی ایک مسافر کوچ ٹائی راڈ ٹوٹنے کی وجہ سے الٹ گئی۔ بس الٹنے کے بعد اسے آگ نے لپیٹ میں لےلیا۔ ارد گرد کے لوگوں کی ایک بڑی تعداد جائے حادثہ پر پہنچ گئی اور آگ بجھا کر پھنسے ہوئے مسافروں کو باہر نکالا۔

حادثے میں فوت ہونے والے بارہ افراد میں پانچ بچے بھی شامل ہیں۔ اس کے علاوہ پانچ سگےبھائی بھی اس حادثے کا شکار ہوگئے ہیں۔ زخمیوں کو روہڑی اور سکھر کے سول ہپستالوں پہنچایاگیا ہے۔ ڈاکٹروں کے مطابق پانچ زخمیوں کی حالت تشویشناک ہے۔

عید کی چھٹیوں کی وجہ سے سول ہسپتال میں ڈاکٹر اور دیگر عملے کی کمی کی وجہ سے زخمیوں کو مشکلات پیش آ رہی ہیں۔ تاہم عملے کو ہنگامی بنیادوں پر طلب کر لیا گیا۔

ضلع ناظم سکھر کے مطابق تمام زخمی اور ہلاک ہونے والے لوگوں کا تعلق سائٹ ایریا سے ہے۔ روہڑی کے تحصیل ناظم کا کہنا ہے عملے، دوائیوں اورخون کی عدم دستیابی کے باعث فوت ہونے والوں کی تعداد بڑھنے کا خدشہ ہے۔

سکھر کے سائیٹ ایریا کے گاؤں مشائخ کے رہائشی مسافر اروڑ میں بزرگ شکر شاہ کی درگاہ پر منت کا چڑھاوا چڑھانے کے بعد واپس آرہے تھے کہ کوچ حادثے کا شکار ہوگئی ۔