ریاض سہیل بی بی سی اردو ڈاٹ کام، کراچی

	گوادر میں لینڈ مافیا نے پنجاب اور سندھ کے بااثر افراد کو زمین الاٹ کی ہے: کچکول علی

حکومتی اقدامات پر تنقید کرتے ہوئے ان کا کہنا تھا کہ اگر پارلیمانی کمیٹی موثر کردار ادا کرتی تو ان لوگوں کو ریلیف پہنچتا جو عدالت تک نہیں جاسکتے ہیں۔

سپریم کورٹ کی جانب سے ججوں کو زمین کی الاٹمنٹ رد کرنے کے فیصلے کا خیر مقدم کرتے ہوئے انہوں نے کہا کہ جب حکومت خود ہی مالی بے ضابطگیوں اور بے قاعدگیوں میں ملوث ہوجائے اور لوگوں کے مفادات کا تحفظ نہ کرے تو پھر لوگ عدالت کا سہارا لیتے ہیں۔

کچکول علی کے مطابق اس کمیٹی کے پہلے اجلاس میں اس بات اتفاق رائے پیدا ہوا گیا تھا کہ ہزاروں ایکڑ زمین کی چھان بین سے قبل جن اشخاص کو سو سو ایکڑ زمین الاٹ کی گئی ہے ان کی چھان بین کی جائے کہ یہ کون ہیں، ان کا کس جگہ سے تعلق ہے اور انہیں کس طرح زمین الاٹ کی گئی ہے۔

ان کا کہنا تھا کہ اس تجویز پر کمیٹی نے اتفاق کیا بعد میں لینڈ مافیا نے اپنے پسندیدہ افراد کے لیئے ایک ایک سو ایکڑ زمین کا بندوسبت کرلیا تو وہ اس تجویز سے مکر گئے۔

جن وزراء اور حکومتی حکام نے لینڈ مافیا کے ذریعے زمین حاصل کی ہے، ہم ان کی منسوخی کا مطالبہ کرتے ہیں کچکول علی

ان کا کہنا تھا کہ ’جن وزراء اور حکومتی حکام نے لینڈ مافیا کے ذریعے زمین حاصل کی ہے، ہم ان کی منسوخی کا مطالبہ کرتے ہیں‘۔

انہوں نے مطالبہ کیا کہ گودار کے علاقے بلے چات اور زبادڈن کی الاٹمنٹ رد کی جائے کیونکہ ان علاقوں میں لینڈ مافیا نے زیادہ تر پنجاب اور سندھ کے لوگوں کو بااثر افراد کو زمین الاٹ کی ہے۔

ان کا کہنا تھا کہ ان علاقوں میں بااثر افراد نے چھ ہزار ایکڑ کے قریب زمین عوام سے سستے دام خرید کر اپنے نام کروائی ہے جس کو منسوخ ہونا چاہیے۔

ان کے مطابق مقامی افراد کے پاس اپنی زمینوں کے کاغذات موجود ہیں۔ رسم و رواج کے مطابق اس اراضی کی ڈی مارکیشن بھی کی ہوئی ہوتی ہے۔

واضح رہے کہ وفاقی وزیر زبیدہ جلال، محکمہ خزانہ اور محکمہ بلدیات کے وزراء اور اپوزیشن رہنما ایڈووکیٹ کچکول علی پر مشتمل پارلیمانی کمیٹی اب تک کسی اتفاق رائے پر نہیں پہنچ سکی ہے۔