دلاور خان وزیر بی بی سی اردو ڈاٹ کام ، ڈیرہ اسماعیل خان

	جنوبی وزیرستان میں فوج کی چو کسی کے باوجود طالبان نےحملہ کردیا

جنوبی وزیرستان کے ہی ایک دوسرے علاقے میں ایک بارودی سرنگ کے دھماکے میں فوج کے تین اہلکار زخمی ہوگئے۔

پہلاواقعہ جمع کی صبح چار بجے وانا سے پچیس کلومیٹر دور شکئی میں اس وقت پیش آیا جب شکئی آرمی کیمپ اور اور گنج سر مورچہ پر قریبی پہاڑی سلسلے سے کئی راکٹ داغےگئے۔

سرکاری ذرائع نے بی بی سی کو بتایا کہ ایک درجن سے زیادہ راکٹ شکئی آرمی کیمپ اور گنج سر پہاڑی مورچہ پر داغے گئے جو شکئی کے ارد گرد جا گرے جبکہ ایک راکٹ گنج سر کے مورچہ پرگرا جس کے نتیجہ میں دو فوجی موقع پر ہی ہلاک، جبکہ تین شدید زخمی ہوگئے۔ہلاک ہونے والوں میں عبدالرحمٰن اور عمران شامل ہیں۔ زخمیوں کو ہیلی کاپٹر کےذریعہ بنومنتقل کر دیا گیا ہے۔

سرکاری ذرائع نے یہ بھی بتایا کہ راکٹ حملے کے بعد فوج نے جوابی کارروائی کی جس میں توپ اور مارٹر کااستعمال کیا گیا۔اس دوران دوسری جانب سے بھی مسلسل راکٹ سے حملے کیئے جاتے رہے۔ یہ لڑائی صبح چار بجے سےسات بجے تک جاری رہی ہے۔

اس کےعلاوہ افغان سرحد کےقریب انگوراڈا میں ایک فوجی گاڑی اس وقت بارودی سرنگ سے ٹکراگئی جب وہ کیمپ کے کچھ فاصلے پر فوجیوں کےلیئے پانی لارہی تھی۔اس حادثہ میں تین فوجی زخمی ہو گئے۔ انہیں وانا کے ہسپتال میں داخل کرادیا گیا ہے۔