عزیز اللہ خان بی بی سی اردو ڈاٹ کام، کوئٹہ

	گیس پائپ لائن میں دھماکے سے قریبی علاقوں کو گیس کی ترسیل معطل ہو گئی ہے

پولیس حکام نے بتایا ہے کہ حب شہر میں سوک سنٹر کے سامنے گیس پائپ لائن اور پانی کی لائن ساتھ ساتھ گزرتی ہیں ۔ گیس پائپ لائن میں دھماکے سے قریبی علاقوں کو گیس کی ترسیل معطل ہو گئی ہے۔

ڈپٹی انسپکٹر جنرل پولیس خضدار رینج پرویز ظہور نے بتایا ہے کہ یہ دھماکہ فنی خرابی کی وجہ سے ہوا ہے تخریب کاری کے کوئی شواہد نہیں ملے ہیں۔

دریں اثنا ایک نامعلوم شخص نے ٹیلیفون پر اپنا نام آزاد بلوچ بتایا ہے اور کہا ہے کہ وہ کالعدم تنظیم بلوچ لبریشن آرمی کے ترجمان ہیں اور حب شہر میں گیس پائپ لائن پر دھماکے کی ذمہ داری قبول کرتے ہیں۔

آزاد بلوچ نے کہا ہے کہ آج کوہلو میں کاہان کے قریب کرمو وڈھ اور چھبی کچھ کے علاقوں میں انھوں نے سیکیورٹی فورسز کے قافلے اور ایک چوکی پر حملہ کیا ہے جس میں فورسز کا نقصان ہوا ہے۔ لیکن سرکاری سطح پر اس دعوے کی تصدیق نہیں ہو سکی۔

اس کے علاوہ کل شام کوئٹہ کے سریاب روڈ پر شفیع کالونی میں نامعلوم افراد نے ایک مکان پر دستی بم پھینکا ہے جس سے کھڑکیوں کے شیشے وغیرہ ٹوٹ گئے ہیں لیکن کوئی جانی نقصان نہیں ہوا ہے۔