محسن عباس ٹورانٹو، کینیڈا

	سی جے ایف ای دنیا بھر سے دو صحافیوں کو اس ایوارڈ کے لیئے منتخب کرتی ہے

سی جے ایف ای کی ایوارڈ کمیٹی کی چیئر پرسن اور کینیڈین صحافی کیرول آف نے بتایا کہ اس سال کے ایوارڈ کے لیئے منتخب افراد کا انتخاب ان ممالک سے کیا گیا ہے جہاں پر صحافیوں کو اپنے پیشے کو سرانجام دینے کے لیئے سخت مشکلات کا سامنا کرنا پڑتا ہے۔ ان افراد نے صحافتی فریضے کوبخوبی سے سرانجام دیتے ہوئے ہمیشہ سچ لکھا اور دنیا کو ان ممالک میں بسنے والے افراد کے بارے میں خبروں سے آگاہ رکھا ہے۔

سی جے ایف ای اس سے قبل دنیا بھر سے دو صحافیوں کو اس ایوارڈ کے لیئے منتخب کرتی رہی ہے مگر اس برس پاکستانی صحافی حیات اللہ مرحوم کوخصوصی طور پر اس ایوارڈ کے لیئے منتخب کیا گیا ہے۔ فاٹا کے علاقے میں کام کرنے والے مرحوم صحافی حیات اللہ کو دسمبر دو ہزار پانچ میں اغواء کیا گیا تھا اور ان کی ہتھکڑیوں میں جکڑی ہوئی لاش سولہ جون دو ہزار چھ کو شمالی وزیرستان سے ملی تھی۔

	سی جے ایف ای کی ایوارڈ کمیٹی کی چیئر پرسن اور کینیڈین صحافی کیرول آف

صحافی حیات اللہ کے علاوہ ایک نوجوان مصری صحافی عبیر العسکری اور کولمبیا کے صحافی ہالمین مورس کو بھی آزادی صحافت کا ایوارڈ دیا جا ئے گا۔
کیرل آف نے کہا کہ حیات اللہ کا قتل صحافیوں کے خلاف خطرناک اقدام کی ایک اہم مثال ہے اور ایوارڈ کے لیئے منتخب ہونے والے دوسرے دو افراد کے قلم کو سچ لکھنے سے روکنے کے لیئے ان کے ممالک میں موجود حکومتوں نے بھی خطرناک حربوں کا استعمال کیا ہے۔

سی جے ایف ای کی ایگزیکٹو ڈائریکٹر عینی گیم نے کہا ہے کہ ’حیات اللہ نے صحافتی فریضہ سرانجام دینے کے لیئے جو قیمت ادا کی ہے وہ بہت بڑی قربانی ہے اور میں سمجھتی ہوں کہ ایسی قربانی کسی بھی صحافی کے لیئے بہت مشکل ہے اور دعا ہے کہ کسی بھی صحافی کو اس طرح کی قربانی نہ دینی پڑے۔ اپنی جان کا نذرانہ پیش کرکے ان صحافیوں نے لوگوں کو سچ سےباخبر رکھا۔ جو انتہائی قابل ستائش ہے۔ سن دو ہزار پانچ میں 63 صحافی دنیا بھر کے مختلف ممالک میں ہلاک یا قتل ہوئے۔اس برس حیات اللہ سمیت53 صحافی دوران فرائض جانیں گنوا چکے ہیں۔ ہم امید کرتے ھیں کہ یہ ایوارڈ صحافیوں کے قتل عام کو روکنے کے لیئے تحریک کو اجاگر کریں گے‘۔

عینی گیم نے حکومت پاکستان سے صحافیوں کے تحفظ اور تقدس کی اپیل کی ہے۔ انہوں نے کہا اگر ان صحافیوں کو تحفظ نہیں ملے گا تو عوام میں اظہار رائے کی آزادی کیسے ہوگی۔

سی جے ایف ای دنیا کی دیگر بہتر72 صحافتی تنظیموں کے ہمراہ آئی فیکس کے پلیٹ فارم سے آزادی صحافت اور صحافیوں کے حقوق کے لیئے کا م کرنے والی تنظیم ہے۔