رفعت اللہ اورکزئی بی بی سی اردو ڈاٹ کام، پشاور

	صوبہ سرحد میں ہوائی فائرنگ کو روکنے کے لیے مہم چلائی جا رہی ہے۔

یکم ستمبر سے شروع ہونے والی اس دس روزہ مہم کا انعقاد محکمہ داخلہ، محکمہ اطلاعات اور پولیس مشترکہ طور پر کر رہی ہیں۔

پشاور میں اخبار نویسوں سے گفتگو کرتے ہوئے صوبائی وزیر اطلاعات آصف اقبال داؤدزئی کا کہنا تھا کہ اس مہم کو کامیاب بنانے کےلیئے عوامی نمائندوں، علماء کرام اور غیر سرکاری تنظیموں کی خدمات بھی حاصل کی جائینگی۔

انہوں نے کہا کہ اس مہم کے دوران صوبے کے تمام تھانوں میں سیمنارز منعقد کئے جائیں گے جس میں عوامی نمائندوں ، باآثر شخصیات اور سماجی کارکنوں کی مدد سے زیادہ سے زیادہ لوگوں کو ہوائی فائرنگ کے نقصانات سے متعلق آگاہ کیا جائے گا۔

صوبائی وزیر نے ہوائی فائرنگ سےمتعلق ایک عالم دین مولانا حسن جان کے فتوی کا حوالہ دیتے ہوئے بتایا کہ ’اس فتوے کے مطابق ہوائی فائرنگ سے جان بحق ہونے والہ شہید اور فائرنگ کرنے والا قاتل قرار دیا جاتا ہے اور اس کے عمل پر دیت لازم ہوجاتی ہے جس کی اسلام میں سو اونٹوں کی برابر رقم اور دو ماہ تک مسلسل روزے رکھنے کی سزا مقرر ہے۔

انہوں نے کہا کہ ملکی قوانین کے تحت ہوائی فائرنگ کی سزا ایک سال قید اور دس ہزار روپے جرمانہ مقرر ہے جس میں اضافہ کرنے کے لیئے صوبائی حکومت نے متعلقہ محکموں کو ہدایت کی ہے کہ وہ جلد از جلد اس بارے میں ڈرافٹ تیار کرے تاکہ اس بارے میں قانون سازی کی جاسکے۔

صوبہ سرحد کے مختلف شہروں اور دیہات میں ہوائی فائرنگ کرنا ایک معمول بن گیا ہے۔ پشتونوں کے علاقوں میں شادی بیاہ یا دیگر خوشی کے مواقعوں پر ہوائی فائرنگ کو فخر سمجھا جاتا ہے۔بعض لوگ اس کو پشتونوں کی ثقافت سے بھی جوڑتے ہیں۔

صوبہ سرحد میں ہر سال ہوائی فائرنگ کے واقعات میں بڑی تعداد میں بے گناہ لوگ ہلاک و زخمی ہوتے ہیں۔ان واقعات میں اضافے کی ایک بڑی وجہ غیر لائسنس شدہ اسلحہ کی بھر مار، مقامی پولیس کی غیر موثر حکمت عملی اور ملکی قوانین پر عمل درآمد کا فقدان بتایا جاتا ہے ۔

پشاور میں ایک مقامی صحافی انورعلی بنگش کا کہنا ہے کہ ہوائی فائرنگ میں اکثر اوقات باآثر لوگ ملوث ہوتے ہیں اور یہی وہ بڑی وجہ ہے کہ پولیس ان باآثر افراد کے خلاف کارروائی کرنے سے کتراتی ہے جس کی وجہ سے اس لعنت پر قابو پانا مشکل ہورہا ہے۔

صوبہ سرحد میں ہر سال ہوائی فائرنگ کے سینکڑوں مقدمات درج ہوتے ہیں لیکن قانونی ماہرین کے مطابق ملکی قوانین غیر موثر ہونے کی وجہ سے اکثر ملزمان سزا سے بچ جاتے ہیں ۔