عدنان عادل بی بی سی اردو ڈاٹ کام، لاہور

	لاہور ہائی کورٹ کے حکم پر حافظ سعید کی نظر بندی ختم کی گئی تھی۔

سوموار کو لاہور ہائی کورٹ نے اٹھارہ دنوں سے نظر بند حافظ سعید کو رہا کرنے کا حکم دیا تھا۔پنجاب حکومت نے انہیں دس اگست کو ایک ماہ کے لیئے نظر بند کرنے کے احکامات جاری کیے تھے۔

انہیں رات کو آٹھ بجے کے قریب شیخوپورہ ریسٹ ہاؤس سے رہا کردیا گیا اور وہ گیارہ بجے کے قریب لاہور میں اپنےگھر پہنچے تو پولیس وہاں موجود تھی جس نے انہیں بتایا کہ ان کی دوبارہ نظر بندی کےاحکامات جاری ہوگئے ہیں۔

جماعت الدعوۃ کے ترجمان یحٰی مجاہد نے بتایا کہ نصف شب کے بعد ایک بجے حافظ سعید کو دو ماہ کے لیے نظر بند کرنے کے احکامات دیئے گئے اور دو بجے انہیں شیخوپورہ ریسٹ ہاؤس منتقل کردیا گیا۔

پنجاب کے محکمہ داخلہ کےاحکامات کے مطابق حافظ سعید کو امن برقرار رکھنے کے قانون تین ایم پی او کے تحت نظر بند کیا گیا ہے۔

جماعت الدعوۃ کے ترجمان کا کہنا ہے کہ حافظ سعید کی نظربندی کو دوبارہ لاہور ہائی کورٹ میں چیلنج کیا جائے گا۔

گزشتہ جولائی میں ممبئی بم دھماکوں میں تقریباً دو سو ہلاکتوں کے بعد بھارت حکومت نے حافظ سعید کی سربراہی میں قائم کی گئی ممنوعہ تنظیم لشکر طیبہ کو اس کا ذمہ دار قرار دیا تھا۔

تاہم حافظ سعید کی موجودہ تنظیم جماعت الدعوۃ کے ترجمان کا کہنا ہے کہ ان کا لشکر طیبہ سے کوئی تعلق نہیں۔