رفعت اللہ اورکزئی بی بی سی اردو ڈاٹ کام، پشاور

	کانفرنس پشاور میں منعقد ہوئی

عالمی مجلس ادیان اور وزارت مذہبی امور صوبہ سرحد کے زیر اہتمام جمعرات کے روز پشاور میں منعقدہ بین المذاہب امن و ہم آہنگی کانفرنس میں مسلم ، ہندو، سکھ، عیسائی اور دیگر مذاہب سے تعلق رکھنے والے سات سو سے زائد مندوبین نے شرکت کی۔

کانفرنس کے اختتام پر جاری کی گئی سات نکاتی اعلامیہ میں ہر قسم کی انفرادی ، گروہی اور ریاستی دہشت گردی کی سخت الفاظ میں مذمت کی گئی اور اس کے خلاف ملکی اور عالمی سطح پر صدائے احتجاج بلند کرنے کا عزم کیا گیا۔اعلامیہ میں عالمی سطح پر انسانیت کش طاقت کے استعمال کی بجائے مکالمے اور دلیل کی روایت کو پروان چڑھانے کی کوشش پر زور دیا گیا ہے۔

کانفرنس سے خطاب کرتے ہوئے صوبہ سرحد کے وزیر اعلی اکرم خان درانی نے کہا کہ مذاہب نفرت پھیلانے کے لئے نہیں بلکہ محبت اور امن وآشتی پیدا کرنے کے لئے لائے گئے ہیں

وزیر اعلی کا کہنا تھا کہ صوبہ سرحد میں ایم ایم اے کی حکومت مذہبی رواداری کے اصولوں پر چل کر کام کر رہی ہے اور یہی وجہ ہے کہ آج جتنی آزادی اقلیتوں کو یہاں حاصل ہے اور کہیںنہیں۔

عالمی مجلس ادیان کے صدر مولانا حنیف جالندھری نے تقریب سے اپنے خطاب میں کہا کہ دراصل یہ مکالمہ مذاہب کے مابین نہیں بلکہ اہل مذاہب کے درمیان ہے جس کا مقصد یہ ہے کہ وہ مل کر اپنے مسائل حل کرسکیں۔ ان کا کہنا تھا کہ اس کانفرنس کا بنیادی مقصد جیو اور جینے دو کی پالیسی ہے اور بقول ان کے آج ایسے فورم کی ضرورت ہے جس کے تحت مختلف مذاہب کے پیروکاروں کو درپیش مسائل کو مکالمہ کے ذریعے سے حل کیا جاسکے۔

کانفرنس سے صوبائی وزیر مذہبی امور آمان اللہ حقانی، مولانا فخر الحسن کراری، سابق وزیر قاری روح اللہ مدنی، مولانا عبد المالک، بِشپ آف لاہور سموئیل عزریہ، آرن سرف دیال، سردار سردیپ سنگھ، بشپ آف پشاور منوررمل شاہ اور دیگر مذہبی رہنماؤں نے بھی خطاب کیا۔

کانفرنس میں ہندو، عیسائی، مسلم، سکھ اور دیگر مذاہب کے رہنماؤں کے علاوہ ان مذاہب کے پیروکاروں نے بھی بڑی تعداد میں شرکت کی۔