عزیزاللہ خان بی بی سی اردو ڈاٹ کام، کوئٹہ

	بلوچستان میں فوجی کارروائی کوہلو میں راکٹ فائر کرنے سے شروع کی گئی تھی۔

دھماکہ سنیچر کو شام کے وقت ہوا ہے۔ کوہلو کے ضلعی ناظم انجینیئر علی گل مری نے کہا ہے کہ دھماکے سے دو عورتیں اور ایک بچی زخمی ہو گئے تھے لیکن ایک خاتون ملتان ہسپتال پہنچنے سے پہلے دم توڑ گئی ہے۔

کوہلو میں راکٹ باری اور بم دھماکے معمول سے ہوتے رہے ہیں لیکن آج تک یہ واضع نہیں ہو سکا کہ ان دھماکوں کے پیچھے کس کا ہاتھ ہے۔

انجینیئر علی گل مری نے کہا ہے کہ کوہلو میں جو بھی اس طرح کی کارروائی کرتا ہے الزام نواب کے لوگوں پر ہی آتا ہے ۔اس دھماکے کے بارے میں اب تک معلوم نہیں ہو سکا کہ دھماکہ کن لوگوں نے کیا ہے۔

انہوں نے کہا کہ یہ کھلی دہشت گردی ہے اور وہ اس طرح کی کارروائیوں کی سخت الفاظ میں مذمت کرتے ہیں۔

کوہلو میں گزشتہ سال دسمبر میں اس وقت فوجی کارروائی شروع کی گئی جب صدر جنرل پرویز مشرف کے کوہلو کے دورے کے دوران نا معلوم افراد نے راکٹ داغے تھے۔

بلوچ قوم پرستوں کا کہنا ہے کہ کوہلو اور ڈیرہ بگٹی میں فوجی کارروائی بلوچستان کے وسائل پر قبضہ کرنے کے لیے شروع کی گئی ہے کیونکہ یہ صوبہ گیس تیل اور معدنیات کی دولت سے مالا مال ہونے کے ساتھ ساتھ سات سو کلومیٹر طویل ساحل کا مالک ہے۔ وفاقی حکومت بلوچستان میں تین نئی چھاونیاں قائم کر رہی ہے جس کے خلاف بلوچستان اسمبلی متفقہ قرار داد منظور کر چکی ہے۔

وفاقی حکومت کا کہنا ہے کہ یہ فوجی کارروائی ان لوگوں کے خلاف شروع کی گئی ہے جو بلوچستان میں بم دھماکوں اور راکٹ باری کے واقعات میں ملوث ہیں۔