ریاض سہیل بی بی سی اردو ڈاٹ کام کراچی

	پولیس نے پانچ دن بعد لاش ورثاء کے حوالے کی (فائل فوٹو)

کراچی میں ڈاکوؤں کے خلاف کارروائی کے لئے بنائی گئی لیاری ٹاسک فورس کے سربراہ چودھری محمد اسلم، ایس ایچ او بغدادی ناصر الحسن، سب انسپکٹر میر فروش، سب انسپکٹر آصف جمیل قریشی اور اے ایس آئی عبدالغنی پر الزام ہے کہ انہوں نے ایک کھیت مزدور کو ڈاکو قرار دے کرہلاک کردیا تھا۔

آئی جی سندھ کا کہنا ہے کہ یہ گرفتاریاں عدالت کے حکم پرعمل میں آئی ہیں اورآئندہ کارروائی بھی قانون کے مطابق کی جائیگی۔

گزشتہ ماہ کھیت مزدور رسول بخش بروہی کی پولیس تحویل میں ہلاکت کا سپریم کورٹ آف پاکستان نے ازخود نوٹس لیا تھا۔

لیاری ٹاسک فورس کے سربراہ ایس پی چودھری محمد اسلم نے بارہ جولائی کو کراچی میں قتل اوراغوا سمیت کئی وارداتوں میں ملوث ڈاکو معشوق بروہی کو مقابلے میں ہلاک کرنے کا دعویٰ کیا تھا، جس کی گرفتاری پر حکومت کی جانب سے چھ لاکھ رپے انعام مقرر تھا۔

اخبارات میں ہلاک ہونے والے کی تصویر شائع ہونے کے بعد حیدرآباد کے قریب کوٹری میں رہائش پذیر اس کے والدین نے پولیس دعویٰ کو مسترد کیا اور اس کی شناخت رسول بخش بروہی کے طور پرکی جو کراچی کے نواحی علاقے حب میں کھیت مزدور تھا۔

بعد میں پولیس کی ایک اعلی سطح کی ٹیم نے واقعے کی تحقیقات کرکے مقدمہ درج کیا تھا۔

مقامی اخبارات کے مطابق چودھری محمد اسلم نے رسول بخش بروہی کے لواحقین کے پاس قرآن شریف اور معززین کے ہمراہ پہنچ کر معافی طلب کی۔ لواحقین نے انہیں یہ کہہ کر لوٹا دیا اس قتل کا فیصلہ بروہی قبیلے کے سردار کرینگے۔