فراز ہاشمی بی بی سی اردو ڈاٹ کام، اسلام آباد

	لبنان پر اسرائیل کے حملے میں نو سو شہری ہلاک ہو چکے ہیں۔

قومی اسمبلی میں اس قرار داد کی مخالفت میں اقلیتی رکن اسمبلی ایم پی بھنڈارا نے ووٹ دیا جبکہ حزب اقتدار اور حزب اختلاف میں شامل تمام جماعتوں نے اس کے حق میں ووٹ دیئے۔

قرار داد میں کہا گیا کہ پاکستان کی پارلیمان کا یہ’ایوان لبنان کے نہتے شہریوں پر اسرائیل کی ظالمانہ کارروائیوں کی سخت ترین الفاظ میں مذمت کرتا ہے‘۔

قرار داد میں عالمی برادری کو خبردار کیا گیا کہ ’اسرائیلی جارحیت پر اقوام متحدہ کی سلامتی کونسل کی خاموشی کی وجہ سے اس عالمی ادارے کی ساکھ بری طرح متاثر ہو رہی ہے‘۔

قرارداد میں کہا گیا کہ اقوام متحدہ ’اسرائیل کی بربریت پر خاموشی کی وجہ سے لیگ آف نیشنز کی طرح اپنے خاتمے کا بندوبست کر رہی ہے‘۔انہوں نے اقوام متحدہ بے عملی کو مجرمانہ خاموشی قرار دیا۔

قرار داد پر بحث کے دوران ارکان نے واضح کیا کہ او آئی سی کے اعلان مکہ میں اس بات کا اعادہ کیا گیا تھا کہ کسی ایک مسلمان ملک پر حملہ پوری امت مسلمہ پر حملہ تصور کیا جائے گا اور اس کا مشترکہ طور پر دفاع کیا جائے گا۔

قرار داد پر بحث کا آغاز حزب اختلاف کی طرف سے متحدہ مجلس عمل کے رہنما قاضی حسین احمد نے کیا۔ انہوں نے بحث کے دوران پاکستان کی فوجی حکومت کو تنقید کا نشانہ بنایا اور کہا کہ فوجی آمریت کی وجہ سے فوج نے عوام کا اعتماد کھو دیا ہے جس سے ملکی دفاع کمزور ہوا ہے۔

اقیلتی رکن ایم پی بھنڈارا نے اپنی تقریر میں اسرائیل کی پرروز الفاظ میں مذمت کی تاہم ان کا موقف تھا کہ اگر لبنان میں حزب اللہ کی جگہ لبنان کی اپنی فوج اسرائیلی جارحیت کا مقابلہ کر رہی ہوتی تو صورت حال بالکل مختلف ہوتی۔

انہوں نے کہا کہ لشکر طیبہ اور حزب اللہ جیسی تنظیموں کی حمایت نہیں کرنی چاہیے۔ انہوں نے کہا کہ اس مسئلہ کا بنیادی نکتہ یہ ہے کہ فلسطینی میں ایک آزاد فلسطینی ریاست کا قیام عمل میں آنا چاہیے۔ انہوں نے کہا ہمیں اس بات پر زور دینا چاہیے کہ فلسطینی عوام کو علیحدہ ملک بنانے کا حق حاصل ہے اور انہیں یہ حق ملنا چاہیے۔