فراز ہاشمی بی بی سی اردو ڈاٹ کام، اسلام آباد

	جنرل مشرف کی پالیسیوں کی حمایت جاری رکھیں گے: فاروق ستار

ایم کیو ایم کی رابطہ کے ڈپٹی کنوینر فاروق ستار نے بی بی سی اردو کو بتایا ہے کہ حکومت کے ساتھ مذاکرات نہ کرنے کا فیصلہ وزیر اعلی سندھ کے ’قابل اعتراض‘ بیان کے بعد کیا گیا۔

فاروق ستار نے کہا کہ ایم کیو ایم کے وزراء مستفعیٰ ہونے کے فیصلے پر قائم ہیں البتہ ایم کیو ایم جنرل مشرف کی پالیسوں کی اب بھی حمایتی ہے اور پارلیمنٹ میں وہ حکومتی بینچوں پر ہی بیٹھے گی۔

انہوں نے کہا کہ وہ سمجھتے ہیں کہ وزیر اعلی سندھ ارباب رحیم نے یہ بیان کسی کی ایما پر دیا ہے لیکن وہ اس سے زیادہ کچھ کہنے کی پوزیشن میں نہیں ہیں۔

فاروق ستار نے کہا جنرل مشرف سے ملاقات سے پہلے ان کے ایک سیاسی مشیر سے بات چیت ہوئی اور اختلافات تقریباً ختم ہو گئے تھے لیکن وزیر اعلی کے بیان نے ساری صورتحال کو خراب کر دیا۔

ارباب غلام رحیم بھی کہتے ہیں:  شیر کی ایک دن کی زندگی گیدڑ کی سو سالہ زندگی سے بہتر ہے

بابر غوری نے کہا کہ ایم کیوایم نے وزراء کے استعفے پیش کرتے ہوئے صوبائی اور مرکزی حکومت کی حمایت جاری رکھنے کا فیصلہ کیا تھا لیکن اب رابطہ کمیٹی سندھ کی حد تک حکومت کی حمایت جاری رکھنے کے فیصلے پر نظر ثانی کرے گی۔

ایم کیو ایم کے وزراء کے استعفی پیش کیئے جانے سے پیدا ہونے والے سیاسی بحران کو حل کرنے کے لیئے صدر جنرل پرویز مشرف نے منگل کی صبح کیمپ آفس راولپنڈی میں ایم کیو ایم اور وزیرِاعلٰی سندھ کو طلب کیا تھا۔

وزیرِاعلٰی سندھ ارباب غلام رحیم نے کراچی میں حکمران مسلم لیگ کی صوبائی جنرل کونسل سے خطاب کرتے ہوئے کہا تھا کہ ’شیر کی ایک دن کی زندگی گیدڑ کی سو سالہ زندگی سے بہتر ہے‘۔