عدنان عادل بی بی سی اردو ڈاٹ کام، لاہور

	عبدالستار ایدھی نے دمشق میں دیگر لبنانی پناہ گزینوں کے کیمپوں کا دورہ بھی کیا

لاہور، کراچی اور پشاور میں احتجاج

ضمیمہ: لبنان پر اسرائیلی حملے

عبدالستار ایدھی اپنے دو ساتھیوں کے ہمراہ زمینی راستے کے ذریعے بیروت جانے کی کوشش کریں گے۔

ایدھی کے ترجمان کے مطابق عبدالستار ایدھی نے دمشق پہنچ کر ان اسّی پاکستانی خاندانوں سے ملاقات کی جو لبنان سے ہجرت کر کے پناہ کے لیئے شام آئے ہیں۔ ان لوگوں میں عورتیں اور بچے بھی شامل ہیں اور ان کا تعلق زیادہ تر راولپنڈی اور پنجاب کے دیگر علاقوں سے ہے۔ عبدالستار ایدھی نے ان لوگوں میں کھانا اور خشک دودھ بھی تقسیم کیا۔

ترجمان کے مطابق عبدالستار ایدھی نے دمشق میں دیگر لبنانی پناہ گزینوں کے کیمپوں کا دورہ بھی کیا جہاں زیادہ تر بچے، عورتیں اور ضعیف افراد ہیں۔ ایدھی نے انہیں بھی کھانا، خشک دودھ اور دوائیں فراہم کیں۔

ترجمان کا کہنا تھا کہ ایدھی بیروت پہنچنے کے بعد مقامی باشندوں سے رضا کار منتخب کر کے امدادی کاروائیاں انجام دیں گے۔ ترجمان کے مطابق ایدھی اپنے ساتھ امدادی سامان کی بجائے دس لاکھ امریکی ڈالر لے کر گئے ہیں تاکہ مقامی طور پر ضروری سامان خرید سکیں۔

عبدالستار ایدھی کا کہنا ہے کہ ان سے کسی ایک انسان کو بھی فائدہ پہنچتا ہو تو وہ کسی بھی مشکل یا خطرہ کے باوجود کسی بھی جگہ جانے کو تیار ہیں۔

یاد رہے کہ پاکستان کے وزیراعظم شوکت عزیز نے بھی لبنان کو امداد فراہم کرنے کی پیشکش کی ہے اور غذائی امداد اور ادویات سے بھرے دو طیارے لبنان بھیجنے کی منظور بھی دی ہے۔

لبنان پر اسرائیل کی بمباری کے بعد پاکستان میں لبنان اور حزب اللہ کی حمایت میں روزانہ مظاہرے ہورہے ہیں۔