اعجاز مہر بی بی سی اردو ڈاٹ کام، اسلام آباد

	ماچس پر ایک اشتہار

پاکستان میں قائم امریکی سفارتخانے جانے والوں کو یہ ماچس تحفے میں دی جاتی ہے جس کے ایک طرف مطلوبہ شخص کی تصویر ہے اور دوسری جانب انعامات کی تفصیل اور معلومات دینے کے لیے فون نمبر اور ای میل ایڈریس درج ہیں۔

ہرے رنگ کی ایک ماچس جو بی بی سی کو ملی ہے اس پر القاعدہ کے ایک سرکردہ رکن عدنان جی الشکری جمعہ کا نام اور تصویر شائع کی گئی ہے۔

اس پر تحریر ہے کہ ’آپ ہمیں عدنان جی الشکری جمعہ دیں ہم آپ کو ڈالر دیں گے‘۔ ماچس پر لفظ ڈالر تحریر نہیں ہے لیکن سکوں کی تصویر ہے۔ اس ماچس پر ٹیکساس کی اٹلس کمپنی کا نام بھی درج ہے۔

ماچس پر اشتہار  حکومتِ ریاست ہائے متحدہ امریکہ مطلوب دہشت گردوں کی گرفتاری میں مددگار معلومات فراہم کرنے کے لیے تیس کروڑ روپے تک کے انعامات کی پیشکش کرتی ہے۔

اس انعام کے ساتھ ساتھ آباد کاری کی سہولت اور تحفظ بھی فراہم کیا جائے گا۔ آپ کو مکمل رازداری کی یقین دہانی کراتے ہیں۔‘

ماچس پر مزید لکھا ہے کہ معلومات فراہم کرنے کے لیے ’براہ کرم فون نمبر اور ای میل یا امریکہ کے قریبی سفارتخانے سے رابطہ کریں‘۔

’امن کے لیے انعام، کے نام سے شروع کردہ اس پروگرام کے تحت امریکہ نے اس سے پہلے پاکستان کی اخبارات میں اشتہارات شائع کرائے تھے۔‘

واضح رہے کہ عدنان جی الشکری جمعہ کے سر کی قیمت پچاس لاکھ ڈالر مقرر کی گئی ہے۔