عدالت میں اختر عباس اور غلام عباس کی نمائندگی سٹاک ہوم کے معروف وکلاء نے کی

سزا پانے والوں میں غیرت کے نام پر قتل ہونے والی لڑکی کے بھائی، والد اور دو چچا شامل شامل ہیں۔

ڈنمارک کے قانون کے مطابق عمر قید پانے والوں کی سزا سولہ سال میں تبدیل ہو جائے گی۔

غیرت کے نام پر قتل کا یہ واقعہ گزشتہ سال ستمبر میں پیش آیا تھا۔ مبینہ طور پر غیرت کے نام پر قتل ہونے والی انیس سالہ غزالہ خان ایک افغان لڑکے سے محبت کرتی تھی لیکن اس کا خاندان اس صورت حال سے ناخوش تھا۔

پانچ دیگر افراد جن میں غزالہ خان کے رشتہ دار اور پاکستانی کمیونٹی کے وہ افراد شامل ہیں جنہوں نے غزالہ خان اور ان کے خاوند کی تلاش میں حصہ لیا تھا پانچ سے چودہ سال قید کے سزاوار قرار دیئے گئے ہیں۔

سزا پانے والوں میں سے دو پاکستانی شہری ہیں اور انہیں پاکستان ڈی پورٹ کیئے جانے کا سامنا ہے۔

مقدمے کی سماعت کے دوران عدالت کو بتایا گیا کہ گزشتہ سال ستمبر میں غزالہ خان نے اپنے گھر سے بھاگ کر خاندان کی مرضی کے خلاف 27 سالہ ایمال سے شادی کر لی۔ لیکن اس شادی کے دو دن بعد ہی غزالہ خان کو اس کے بھائی اختر عباس نے اس پرہجوم سٹیشن پر گولیاں مار کر ہلاک کر دیا جبکہ اس کا خاوند زخمی ہو گیا۔

برطانوی خبر رساں ادارے رائٹرز نے پولیس کے حوالے سے بتایا ہے کہ غزالہ خان کے خاندان نے اس کے گھر سے غائب ہونے کے بعد تین ہفتے تک اس کو تلاش کیا اور میں اس کی خالہ کے ذریعے اسے یہ کہہ کر سٹیشن پر بلایا کہ اس کا خاندان اس سے ناراضگی ختم کرنا چاہتا ہے۔

غزالہ خان کے والد غلام عباس کا تعلق پاکستان کے ضلع گجرات سے ہے اور وہ 1970 کے عشرے میں ڈنمارک آکر آباد ہوئے تھے۔ وہ ڈنمارک میں ایک ٹیکسی کمپنی کے مالک ہیں اور ان شمار ڈنمارک میں آباد پاکستانی کمیونٹی کے امیر ترین افراد میں ہوتا ہے۔

گزشتہ کچھ عرصہ میں ڈنمارک میں چار پاکستان نژاد لڑکیاں غیرت کے نام پر قتل ہوئی ہیں۔ اسی وجہ سے غزالہ خان قتل کیس کو ڈینش ذرائع ابلاغ میں زبردست توجہ حاصل ہوئی ہے اور یہ معاملہ گزشتہ ایک سال سے شہ سرخیوں میں ہے۔