اعجاز مہر بی بی سی اردو ڈاٹ کام، اسلام آباد

	پریس کانفرنس میں حافظ حسین احمد کے سوا کسی بڑی سیاسی جماعت کا کوئی سرکردہ رہنما نظر نہیں آیا

یہ مطالبہ سنیچر کے روز جماعت اسلامی کی میزبانی میں کراچی کے اندر دہشت گردی اور بدامنی کے متعلق کل جماعتی کانفرنس کے شرکاء نے ایک مشترکہ بیان میں کیا ہے۔

پاکستان پیپلز پارٹی، مسلم لیگ نواز، جمیعت علما اسلام (فضل الرحمٰن) اور دیگر سیاسی اور مذہبی جماعتوں کے نمائندے کانفرنس میں شریک ہوئے۔

جماعت اسلامی کے سربراہ قاضی حسین احمد نے نیوز بریفنگ میں دعویٰ کیا کہ گزشتہ چار برسوں میں کراچی شہر کے اندر ساڑھے چھ سو سے زائد سیاسی اور مذہبی رہنماؤں، کارکنوں، علما، صحافیوں اور سیکورٹی ایجنسیوں کے اہلکاروں کو چن چن کر ہلاک کیا گیا۔

ا

الزامات مسترد  جو جماعتیں عوام میں اپنی ساکھ کھوچکی ہیں وہ ایم کیو ایم کی جماعت کی مقبولیت سے پریشان ہوکر ان پر الزامات لگا رہی ہیں فاروق ستار

قاضی حسین احمد نے کراچی میں کچی بستیاں اور قدیمی گوٹھ گرانے اور مبینہ طور پر بھتہ خوری کے الزامات بھی ایم کیو ایم پر لگائے اور کہا کہ الطاف حسین کو حکومت انٹر پول کے ذریعے واپس لاکر ان پر مقدمات چلائے۔

جب ان سے پوچھا گیا کہ انہوں نے اعداد وشمار کہاں سے حاصل کیے ہیں اور ایم کیو ایم پر سنگیں الزام کس بنا پر لگا رہے ہیں؟ تو انہوں نے کہا کہ اعداد وشمار حکومت کے فراہم کردہ ہیں اور سب کو معلوم ہے کہ سندھ حکومت کے وزراء کی سرپرستی میں قتل و غارت گری اور بھتہ خوری میں ایم کیو ایم ملوث ہے۔

کانفرنس کا اعلامیہ پڑھتے ہوئے انہوں نے کہا کہ صدر جنرل پرویز مشرف اپنی فوجی حکومت کو دوام بخشنے کی خاطر ایم کیو ایم کی سرپرستی کر رہے ہیں۔ ان کے مطابق کراچی کے پولیس تھانے لسانی جماعت کے یونٹ بنے ہوئے ہیں۔

جماعت اسلامی کراچی کے امیر معراج الہدیٰ نے اس موقع پر دعویٰ کیا کہ کراچی میں گزشتہ ایک ہفتے کے اندر سینتالیس افراد قتل اور ساڑھے سات سو ڈکیتیاں ہوچکی ہیں۔

کانفرنس کے شرکاء نے کراچی میں بجلی کی مسلسل لوڈ شیڈنگ سے عوام کو لاحق پریشانی اور کاروبار متاثر ہونے کا بھی ذکر کیا اور کہا کہ حکومت اپنے فرائص ادا کرنے میں ناکام ہوچکی ہے۔

جماعت اسلامی کی کانفرنس میں شریک تو بیشتر جماعتوں کے نمائندے ہوئے لیکن پریس کانفرنس میں حافظ حسین احمد کے سوا کسی بڑی سیاسی جماعت کا کوئی سرکردہ رہنما نظر نہیں آیا۔

جب سنگین الزامات کے سلسلے میں متحدہ قومی موومنٹ یعنی ایم کیو ایم کے سرکردہ رہنما ڈاکٹر فاروق ستار سے رابطہ کیا تو انہوں نے تمام الزامات کو مسترد کرتے ہوئے کہا کہ جو جماعتیں عوام میں اپنی ساکھ کھوچکی ہیں وہ ان کی جماعت کی مقبولیت سے پریشان ہوکر ان پر الزامات لگا رہی ہیں۔