عدنان عادل بی بی سی اردو ڈاٹ کام، لاہور

	’ملک میں انارکی شروع ہوچکی ہے اور سارا ملک اس کی لپیٹ میں آجائے گا‘

گزشتہ سال ایک بار پھر پیپلز پارٹی میں شامل ہونے والے مصطفٰے کھر نے کہا کہ وہ اپنے بچوں کو اس لیئے ساتھ لائے ہیں کہ وہ بتانا چاہتے ہیں کہ اگر انہیں منظر سے ہٹایا گیا تو ان کا کوئی ایک بچہ سیاست میں داخل ہوگا اور بے نظیر بھٹو کی قیادت میں کام کرے گا۔

مصطفٰےکھر اپنا سیاسی تجزیہ پیش کرنے کے لیئے دو تین ہفتہ کے وقفہ سے پریس کانفرنس منعقد کرتے رہتے ہیں۔ آج بھی انہوں نے اپنا تجزیہ پیش کرنے کے ساتھ ساتھ انگریزی میں لکھا ہوا سات صفحوں کا بیان بھی تقسیم کیا۔

اس بیان میں انہوں نے کہا کہ ملک میں انارکی شروع ہوچکی ہے اور وہ وقت دور نہیں جب سارا ملک اس کی لپیٹ میں آجائے گا۔

انہوں نے امریکہ کے ساتھ ساتھ ایران، ترکی، سعودی عرب سمیت مسلمان ملکوں سے درخواست کی کہ وہ جنرل پرویز مشرف پر اپنا اثر و رسوخ استعمال کریں کہ وہ ملک میں آزادانہ، منصفانہ اور شفاف انتخابات کروائیں جس میں بے نظیر بھٹو، نواز شریف اور الطاف حسین سمیت تمام پاکستانیوں کو الیکشن لڑنےکی اجازت ہو اور ان انتخابات پر فوجی وردی کا سایہ نہ ہو۔

ہمسایہ ممالک اثر ڈالیں  اگر ہمسایہ ممالک فوجی حکمرانوں پر جمہوریت کے لیئے دباؤ ڈالیں تو شاید پاکستان افراتفری اور ٹوٹنے سے بچ جائے۔ کھر

انہوں نے پاکستان کی خودمختاری پر تبصرہ کرتے ہوئے یہ بھی کہا کہ ’پاکستان کی حالت اس وقت کسی ملک کے ایک صوبہ سے بدتر ہے۔‘

مصطٰفے کھر نے کہا کہ اگر ہمسایہ ممالک فوجی حکمرانوں پر جمہوریت کے لیئے دباؤ ڈالیں تو شاید پاکستان افراتفری اور ٹوٹنے سے بچ جائے۔

مصطفٰے کھر نے کہا کہ ’پرویز مشرف کا کوئی تعمیری کردار نہیں رہا۔ بلوچ سیاستدان، بےنظیر بھٹو اور نواز شریف ان سے بات کرنے کے لیئے تیار نہیں اور عوام ان پر اعتماد نہیں کرتے‘۔

کھر نے کہا کہ کوئی معجزہ ہی ہوسکتا ہے کہ اس ملک میں کوئی جرنیل خون خرابے کے بغیر اقتدار چھوڑ دے۔ انہوں نے کہا کہ زیادہ امکان اس بات کا ہے کہ جنرل مشرف ہر قیمت پر اقتدار میں رہنا چاہیں گے۔

مصطٰفے کھر نے کہا کہ سیاستدانوں کو ختم نہیں کیا جاسکتا کیونکہ ایک ہٹا دیا جائے تو اور آجاتے ہیں لیکن ان کے بقول فوج کا ادارہ ٹوٹ گیا تو اس کا دوبارہ بننا ممکن نہیں ہوگا۔

انہوں نے کہا کہ ان حالات میں یہ جنرل مشرف کو فیصلہ کرنا ہے کہ وہ اپنی قربانی دے کر فوج کے ادارہ کو بچالیں۔ انہوں نے کہا کہ ملک کو فوج کی ضرورت ہے لیکن مشرف کی نہیں۔

کھر نے کہا کہ ان کے خیال میں ستمبر میں ملک میں سیاسی سرگرمیاں تیز ہوجائیں گی۔

کھر نے پیشن گوئی کہ اگلے عام انتخابات گزشتہ عام انتخابات سے مختلف اور طوفان کی طرح ہوں گے جس میں کئی سر سلامت نہیں رہ سکیں گے۔

انہوں نے کہا کہ آئندہ الیکشن صرف ایک ایشو پر ہوں گے کہ ملک کو وردی چاہیے یا شلوار قمیض۔

کھر نے دعوٰی کیا کہ یہ فیصلہ ہوچکا ہے کہ نواز شریف اور بے نظیر بھٹو ہر قیمت پر الیکشن کے موقع پر ملک میں واپس آجائیں گے۔تاہم وہ چاہتے ہیں کہ یہ کام امن سے ہوجائے۔