اعجاز مہر بی بی سی اردو ڈاٹ کام، اسلام آباد

	حکومتی وزراء نے بھی قومی اسبملی کی کمیٹی بنانے کی تجویز کی مخالفت نہیں کی۔

جمعہ کے روز پارلیمان کے ایوان زیریں یعنی قومی اسمبلی میں حزب مخالف اور حکومتی اراکین نے قواعد معطل کرکے ملک کے مختلف شہروں میں آلودہ پینے کا پانی فراہم کرنے سے کئی افراد کی ہلاکت اور ہزاروں افراد کے پیٹ کی بیماریوں میں مبتلا ہونے پر تفصیلی بحث کی۔

حزب مخالف کے راجہ نادر پرویز، فرید احمد پراچہ، فوزیہ وہاب، صاحبزادہ ابوالخیر زبیر اور محمد حنیف عباسی جبکہ حکومت کی جانب سے خدا بحش سمیت دیگر اراکین نے کہا کہ حکومت فوری طور پر پینے کا صاف پانی مہیا کرے۔

حزب مخالف کے اراکین نے کہا کہ ایک طرف حکومت ملک میں خوشحالی، غربت میں کمی اور اقتصادی ترقی کے دعوے کر رہی ہے لیکن دوسری جانب پینے کا صاف پانی بھی میسر نہیں کر پا رہی۔

انہوں نے کہا کہ فیصل آباد، لاہور، راولپنڈی، حیدرآباد اور دیگر شہروں میں متاثرین ہسپتالوں میں زیر علاج ہیں لیکن وہاں گلوکوز کے علاوہ حکومت کوئی انہیں دوائی بھی فراہم نہیں کر رہی۔

حکومت پینے کا صاف پانی فراہم کرنے میں نا کام ہوگئی ہے اور آلودہ پانی کی فراہمی سے ہزاروں افراد پیٹ کی بیماریوں میں مبتلا ہیں۔

انہوں نے دعویٰ کیا کہ تحریک التو پر بحث کے دوران فیصل آباد سے مسلم لیگ نواز کے رکن راجہ نادر پرویز نے کہا کہ ان کے شہر میں آلودہ پانی پینے سے تا حال سترہ افراد ہلاک ہوچکے ہیں اور ان میں بیشتر بچے شامل ہیں۔

حکومت اور حزب اختلاف میں اتحاد  حزب اختلاف نے معاملے کی تحقیقات اور آلودہ پانی فراہم کرنے کے ذمہ داران کو سزا دینے کے لیے قومی اسمبلی کی کمیٹی بنانے کا مطالبہ کیا جس کی حکومت اراکین نے بھی حمایت کی۔

انہوں نے کہا کہ ایوان کی کمیٹی چاروں صوبائی حکومتوں سے بات کرے کہ وہ فلٹر پلانٹ لگائیں اور عوام کو صاف پینے کا پانی فراہم کریں۔

بحث کے بعد سپیکر نے ’رولنگ، محفوظ کردی اور ایوان کی کارروائی پیر تک ملتوی کردی۔واضح رہے کہ قومی اسمبلی کا یہ بجٹ اجلاس ہے اور پیر کے روز امکان ہے کہ حکومت یکم جولائی سے شروع ہونے والے مالی سال کے لیے بجٹ پیش کرے گی۔