الطاف حسین کی اپنی اہلیہ کے ساتھ گھریلو ناچاقی چل رہی ہے: فیصل ملک

بی بی سی سے بات کرتے ہوئے فیصل ملک نے بتایا کہ جمعہ کی دوپہر ڈھائی بجے کے قریب گذری تھانے کے ایس ایچ او عرفان ان کے پاس آئے اور بتایا کہ میں گھر سے باہر نہیں نکل سکتا۔

فیصل کے مطابق انہوں نے ایس ایچ او سے تحریری حکمنامے کے بارے میں استفار کیا تو انہوں نے بتایا کہ انہیں ایس ایس پی سیکیورٹی نے حکم دیا ہے کہ آپ کے گھر پولیس مقرر کی جائے۔

ایس ایچ او گذری عرفان احمد نے فیصل ملک کی نظر بندی کی تردید کی اور کہا ہے کہ وہ جہاں چاہیں آجا سکتے ہیں البتہ گھر کے باہر پولیس ان کی حفاظت کے لیئے مقرر ہے جبکہ پولیس کی گاڑیاں اپنے معمول کے مطابق گشت کر رہی ہیں۔

فیصل گبول کے مطابق گھر میں ان کے ساتھ ان کی بیوی، بیٹی اور بیٹا بھی موجود ہے۔ جب ان سے سوال کیا گیا کہ کیا انہوں نے باہر نکلنے کی کوشش کی ہے تو ان کا کہنا تھا کہ یہ انتہائی بدتمیز لوگ ہیں کیا پتہ فائرنگ کردیں اور کل کہیں کہ مقابلہ ہوا تھا، اس لیئے انہوں نے ایسی کوئی کوشش نہیں کی ہے۔

اس سے قبل اٹھائیس مئی کو فیصل ملک کو لندن جانے والی پرواز سے
آف لوڈ کیا گیا تھا جس کے بارے میں ان کا کہنا تھا کہ انہیں کچھ نہیں بتایا گیا کہ یہ کیوں کیا گیا تھا۔

جب ان سے سوال کیا گیا کہ وہ ایک بااثر سیاستدان کے سسر ہیں ان سے ایسا سلوک کیوں کیا جارہا ہے؟ تو ان کا کہنا تھا کہ ان کی بیٹی فائزہ کی لندن میں اپنے شوہر الطاف حسین کے ساتھ گھریلو ناچاقی چل رہی ہے جس میں مجھے رگڑا جا رہا ہے۔ انہوں نے اس ناچاقی کی وجہ بیان نہیں کی۔ جب ان سے یہ پوچھا گیا کہ کیا وہ پاکستان واپس آنا چاہتی ہیں تو ان کا کہنا تھا کہ نہیں وہ لندن میں ہی رہیں گی۔

فیصل گبول نے بتایا کہ وہ وزیر داخلہ سے رابطے کی کوشش کر رہے ہیں مگر بتایا جارہا ہے کہ وہ مصروف ہیں۔ وزیر داخلہ رؤف صدیقی کا تعلق بھی متحدہ قومی موومنٹ سے ہے۔

واضح رہے کہ فیصل ملک سندھ حکومت میں مشیر تھے اور انہیں محکمۂ صحت کا قلمدان دیاگیا تھا جس سے بعد میں انہیں ہٹایا گیاتھا۔

ان کے خلاف محکمہ انسداد رشوت ستانی کی جانب سے تحقیقات کی جارہی ہیں جس کے خلاف انہوں نے سندھ ہائی کورٹ میں درخواست دائر کر رکھی ہے۔