عدنان عادل، بی بی سی اردو ڈاٹ کام، لاہور

	اس سال سعد رفیق کو متنازعہ کارٹونوں کی اشاعت کے خلاف احتجاج کے دوران گرفتار کیا گیا تھا

لاہور کی ایک انسداد دہشت گردی کی عدالت نے سعد رفیق کے خلاف دو سال پہلے شہباز شریف کی لاہور آمد کے موقع پر قائم کیئے گئے دو مقدمات میں پچاس پچاس ہزار کے مچلکوں کے عوض ضمانتیں منظور کیں۔

یہ مقدمہ لوہاری گیٹ پولیس میں درج ہے جس میں سعد رفیق پر چودہ مئی سنہ دو ہزار چار کو پارٹی کے صدر شہباز شریف کی لاہور آمد کے موقع پر جلوس نکالنے، پولیس پر پتھراؤ کرنے اور لوگوں کومشتعل کر کے بھاگ جانے کا الزام لگایاگیا تھا۔

تاہم پولیس نے انہیں اس مقدمہ میں دو سال تاخیر سے اس وقت گرفتار کیا جب عدالت انہیں اس سال فروری میں قائم کیئے گئے تین مقدموں میں رہا کرنے کا حکم دے چکی تھی۔

اس سال چودہ فروری کو خواجہ سعد رفیق کو متنازعہ کارٹونوں کی اشاعت کے خلاف احتجاج کے دوران توڑ پھوڑ اور آگ لگانے کے تین واقعات میں ملوث ہونے کےالزام میں گرفتار کیا گیا تھا۔ ان پر انسداد دہشت گردی کی دفعات کے تحت مقدمہ قائم کیئے گئے تھے۔

ان میں سے دو مقدموں میں انہیں لاہور ہائی کورٹ نے ایک میں انسداد دہشت گردی کی عدالت نے ضمانت پر رہا کرنے کا حکم دیا تھا۔

ایک ہفتہ پہلے سعد رفیق نے پولیس اہلکاروں پر الزام لگایا تھا کہ انہوں نے ان پر جسمانی تشدد کیا ہے۔ دو دن پہلے وزیراعلٰی پنجاب نے پولیس کے دو افسران کو معطل کرکے ان کے خلاف انکوائری کا حکم جاری کیا تھا۔