مبشر زیدی بی بی سی اردو ڈاٹ کام، اسلام آباد

	پاکستان کو بین الاقوامی ذرائع سے برقی توانائی چاہئیے

اس ٹرانسمیشن لائن کے ذریعے پاکستان اپنی معیشت کی بڑھتی ہوئی توانائی کی ضروریات پوری کرنے کے لیئے وسط ایشیا سے ایک ہزار میگا واٹ بجلی درآمد کرنے کا ارادہ رکھتا ہے۔

اس دو روزہ کانفرنس میں ان چاروں ممالک کے علاوہ عالمی بینک، ایشیائی ترقیاتی بینک، یو ایس ایڈ اور اسلامی ترقیاتی بینک کے نمائندے بھی شریک ہیں۔ پاکستانی حکام کا کہنا ہے کہ اس ٹرانسمیشن لائن منصوبے کے لیئے بین الاقوامی ادارے قرضے کی سہولت دینے کو تیار ہیں۔

پاکستان کے بجلی و پانی کے وفاقی وزیر لیاقت جتوئی نے اس کانفرنس کے افتتاحی سیشن سے خطاب کرتے ہوئے کہا کہ پاکستان کی توانائی کی ضروریات تیزی سے بڑھ رہی ہیں اور ان ضروریات کو پورا کرنے کے لیئے حکومت کو بین الاقوامی ذرائع سے برقی توانائی چاہئیے ہوگی۔ واضح رہے کہ وسطی ایشیا کے ممالک پہلے ہی پاکستان کو برقی توانائی برآمد کرنے کی پیشکش کر چکے ہیں اور پاکستان نے تاجکستان کے ساتھ ایک مفاہمت کی یاداشت پر بھی دستخط کیئے ہیں جس کی رو سے پاکستان تاجکستان سے ایک ہزار میگا واٹ بجلی حاصل کرسکے گا۔

اس منصوبے کے فریم ورک کو کل حتمی شکل دی جائے گی تاہم افغانستان کے حالات کے پیش نظر ابھی یہ کہنا مشکل ہے کہ یہ ٹرانسمیشن لائن ایک حقیقت بھی بن پائے گی یا نہیں۔ تاہم افغانستان کے وزیر محمد جلیل شمس کا کہنا ہے کہ اس ٹرانسمشن لائن کے ذریعے افغانستان کو برقی توانائی کی فراہمی ہی اس منصوبے کی حفاظت کی گارنٹی ہو گی کیونکہ جب لوگوں کو پتہ ہو گا کہ اس لائن سے انہیں برقی توانائی مل رہی ہے تو وہ اس کی خود حفاظت کریں گے۔

پاکستان کے بجلی کے وزیر لیاقت جتوئی نے اس موقع پر کہا کہ چاروں ممالک مذہبی،ثقافتی اور دوستانہ تعلقات کی وجہ سے ایک دوسرے کے بہت قریب ہیں جو اس منصوبے کو پایہ تکمیل تک پہنچانے کے لیئے کلیدی حیثیت رکھتے ہے۔

اس منصوبے پر چاروں ممالک کی بات چیت بالکل ابتدائی مراحل میں ہے اور ابھی تک اس منصوبے پر لاگت اور دیگر تفصیلات کے بارے میں کچھ طے نہیں ہوا ہے۔