مبشر زیدی بی بی سی اردو ڈاٹ کام، اسلام آباد

	پاکستان وولر بیراج اور بگھلیار ڈیم کی تعمیر کی محالفت کر رہا ہے

پاکستان کے دفترِ خارجہ کے مطابق یہ دو دوزہ بات چیت کل سے اسلام آباد میں شروع ہونا تھی مگر انڈیا کی وزارتِ آب کے سیکرٹری اپنی دیگر مصروفیات کی وجہ سے اس بات چیت کے لیئے دستیاب نہیں ہیں جس کے باعث یہ بات چیت موخر کی گئی۔

اس بات چیت کے بارے میں نئی تاریخوں کا اعلان جلد ہی کر دیا جائے گا۔

انڈیا کی جانب سے دریائے جہلم پر بنائے جانے والے وولر بیراج کو پاکستان دونوں ممالک کے درمیان ہونے والے سندھ طاس معاہدے کی خلاف ورزی قرار دیتا ہے اور بیراج کے ڈیزائن میں ترمیم کا مطالبہ کرتا آیا ہے۔ انڈیا اور پاکستان کے درمیان اس مسئلے پر بات چیت کے کئی دور ہوتے آئے ہیں مگر ابھی تک اس مسئلے کا کوئی حل نہیں نکلا۔

دفتر خارجہ کی ترجمان تسنیم اسلم نے آج ہفتہ وار بریفنگ میں بگھلیار ڈیم کے تنازعےپر عالمی بینک کی ثالثی کے عمل کے بارے میں بتاتے ہوئے کہا کہ اگلے ماہ اس مسئلے پر عالمی بینک اور دونوں ممالک کے حکام کے درمیان بات چیت کا ایک اور دور ہو گا۔

	انڈیا۔افغان تجارت کراچی کی بندرگاہ کے راستے ہوگی

ترجمان نے پاکستان۔افغانستان۔ انڈیا ٹرانزٹ تجارت کے بارے میں ایک سوال کے جواب میں کہا کہ پاکستان نےافغانستان اور انڈیا کو دو طرفہ تجارت کے لیئے کراچی کے راستے تجارت کرنے کی اجازت دی ہے۔ تاہم ترجمان نے کہا کہ بھارت کو زمینی راستے سے افغانستان کے ساتھ تجارت کی اجازت دینے کا معاملہ پاک انڈیا تجارتی مذاکرات سے مشروط ہے جو ابھی جاری ہیں۔

ایران کے جوہری تنازعے پر ترجمان نے پاکستان کا موقف دوہرایا جس میں کہا گیا ہے کہ پاکستان اس مسئلے کو طاقت کے ذریعے حل کرنے کا مخالف ہے۔

تسنیم اسلم نے یہ بھی بتایا کہ صدر جنرل پرویز مشرف ابوظہبی میں پاکستان اور انڈیا کے مابین دو ایک روزہ کرکٹ میچز میں سے ایک میچ دیکھنے کے لئے ابوظہبی جائیں گے۔